Umutuzo waganje mu karere ka Rubavu kuri uyu wa kabiri tariki 28 Mutarama 2025 bitandukanye no ku munsi wo ku wa mbere ubwo humvikanaga amasasu menshi ndetse yanarasagwa mu Rwanda akica abantu 5 naho abandi barenga 30 bagakomereka.
Kuri uyu wa kabiri, imirwano y’i Goma muri Repubulika Iharanira Demokarasi ya Congo ishyamiranyije M23 n’ingabo z’Igihugu za Repubulika Iharanira Demokarasi ya Congo, FARDC n’imitwe bifatanyije yabaye ihosheje kuva mu masaha y’igitondo kugeza n’ubu. Amasasu aheruka kumvikana cyane mu rukerera rwo kuri uyu munsi.
Hakaba hari amakuru avuga ko aka gahenge kaba katewe n’uko impande zihanganye zemeranyijwe agahenge kuva saa moya z’ijoro i Goma bigizwemo uruhare n’ingabo za MONUSCO nk’uko ingabo za Uruguay ziri mu butumwa bwa MONUSCO zabitangaje n’ubwo yaba FARDC na M23 ntaruhande rwigeze rugira icyo rubivugaho.
Ubwo AMAKURUMASHYA twageraga mu karere ka Rubavu twasanze abaturage bamwe basubiye mu mirimo yabo nk’ibisanzwe n’ubwo hari ibikorwa by’ubucuruzi byinshi byari bigifunze kuko hari abaturage bagifite ubwoba ndetse abandi bakaba barahisemo kuba bahunze uyu Mujyi.
Kimwe nu byaranze Rubavu kuri uyu munsi ni umubare muke w’abantu bari mu mihanda n’impunzi uruvunganzoka zaturukaga muri Repubulika Iharanira Demokarasi ya Congo zinjira mu Rwanda aho zahitaga zerekezwa ku kibuga giteganye n’uruganda rusukura amazi rwa Gihira (Gihira Water Treatment Plant).
Rubavu kandi kuri ubu irasangwamo ibitoro by’amasasu n’ibisasu hirya no hino no kwangirika kw’ibikorwa remezo birimo imihanda, amashuri n’amazu y’abaturage by’aho amasasu n’ibisasu byangije, by’umwihariko ibi bisangwa mu duce twegereye umupaka cyane.
Umwe mu baturage waganiriye n’AMAKURUMASHYA witwa Nshimiyimana Eric utuye muri Rubavu yavuze ko hari ikizere ko ntacyo bazaba kuko bizeye umutekano bacungirwa n’ingabo z’u Rwanda ziri kugaragara ku bwinshi muri uyu Mujyi ndetse zakoze akazi katoroshye ku wa mbere ko guhagarika ibisasu byaterwaga mu Rwanda bivuye muri Repubulika Iharanira Demokarasi ya Congo.
Nshimiyimana yakomeje avuga ko n’ubuyobozi bukomeje kubaba hafi muri ibi bihe bubasaba kwitonda.
Yagize ati,”Abayobozi bacu b’umurenge wa Rubavu ndetse n’umurenge wa Gisenyi bakomeje batubwira ko tugomba kwitonda ntitwegere ahegereye umupaka kuko ntibaratanga itangazo ko amahoro yahinze.”
