Ikipe y’igihugu ya Tanzania ishobora guterwa mpaga igasimbuzwa Guinea mu rutonde rw’amakipe azitabira Igikombe cy’Afurika kizabera muri Maroc muri 2025 nyuma y’uko irezwe gukinisha umukinnyi utari ku rupapuro rw’umukino.
Amakuru dukesha The New York Times aremeza ko Ishyirahamwe ry’Umupira w’Amaguru muri Guinea, FGF, ryamaze gutanga ikirego mu Impuzamashyirahamwe y’Umupira w’Amaguru muri Afurika, CAF, isaba ko Tanzania yakurwa mu Gikombe cy’Afurika nyuma yo gukinisha umukinnyi utari ku rupapuro rw’umukino (Feuille de match).
Ibi byabaye mu mukino wakinwe tariki 19 Ugushyingo 2024 i Dar es Salam kuri Benjamin Mkapa Stadium warangiye Tanzania yari mu rugo itsinze Guinea igitego 1-0 bituma ibona itike y’igikombe cy’Afurika.
Ku munota wa 73, Tanzania yakoze impinduka mu kibuga hinjiramo Muhamed Ame wari wambaye umubare (numĂ©ro) 26 nyamara ku rupapuro rw’umukino ntamukinnyi wambaye iyo numĂ©ro waruriho, Ame yari yanditswe ku rupapuro rw’umukino nka numĂ©ro 24.
Amategeko n’amabwiriza ya CAF mu ngingo yayo ya 50 n’iya 71 handitse ko umukinnyi wemerewe gukoreshwa mu mukino ari uwambaye umwambaro uriho numĂ©ro isa n’iyanditse ku rupapuro rw’umukino.
Muri aya mategeko kandi mu ngingo ya 42, igice cya 12 handitse ko ikipe ikinisha umukinnyi utabyemerewe cyangwa utujuje ibisabwa, iterwa mpaga y’ibitego 3-0 n’ubwo ntakirego cyaba cyatanzwe.
Ibi bivuze ko mu gihe Tanzania yahamwa n’ibi birego byatuma ivanwa mu Gikombe cy’Afurika igasimbuzwa Guinea kuko yaterwa mpaga y’ibitego 3-0.
Ku ruhande rw’Ishyirahamwe ry’Umupira w’Amaguru muri Tanzania, TFF, rivuga ko ntabutumwa ryigeze ryakira buvuye muri CAF ku bijyanye n’ikirego cya Ame ndetse ko uyu mukinnyi ari muri 23 basuzumwe na Guinea ndetse na komiseri w’umukino mbere y’uko umukino utangira bakemererwa kuwukina.
Mu itangazo TFF yashyize hanze yakomeje isaba abanya-Tanzania kutagira igituma batishimira intsinzi y’ikipe yabo bitewe n’ibiri gucaracara ku mbuga nkoranyambaga.
Tanzania yakiriye Guinea mu mukino w’umunsi wa 6 w’amatsinda yo gushaka itike y’igikombe cy’Afurika kizabera muri Maroc muri 2025.
Izi kipe zombi zari kumwe mu itsinda H, uyu mukino wagiye gukinwa Guinea ari iya kabiri mu itsinda n’amanota 9 inyuma ya Repubulika Iharanira Demokarasi ya Congo yari yaramaze kubona itike, Tanzania yari iya gatatu n’amanota 7 bivuze ko Tanzania yasabwa gutsinda umukino wa nyuma kugira ngo ikatishe itike y’igikombe cy’Afurika.
Ibi Tanzania yabigezeho nyuma yo gutsinda Guinea igitego 1-0 cyatsinzwe na Simon Msuva ku munota wa 61 yahise igira amanota 10, iba iya kabiri mu itsinda naho Guinea irangiza imikino y’amatsinda ari iya gatatu n’amanota 9.