APR WVC na APR VC zatsinze Kepler WVC na Kepler VC mu mikino yabimburiye indi y’umunsi wa gatatu (Round 3) uri gukinirwa i Gisagara n’i Huye kuva kuri uyu wa gatanu tariki 15 Ugushyingo 2024.
Saa kumi n’imwe z’umugoroba nibwo umukino wa APR WVC na Kepler WVC watangiye mu nzu y’imikino y’i Gisagara (Gisagara Gymnasium).
Uyu mukino warangiye APR WVC ifite igikombe giheruka cya Shampiyona itsinze Kepler WVC iri gukina shampiyona ku nshuro yayo ya mbere amaseti 3-0 (25-19, 25-20, 25-18).
Nyuma y’uyu mukino hakurikiyeho umukino wa APR VC na Kepler VC mu bagabo, aya makipe akaba ari nayo yahuriye ku mikino ya nyuma ya kamarampaka yarangiye APR VC ariyo yegukanye igikombe.
Uyu mukino waruryoheye ijisho ndetse ukomeye ku makipe yombi warangiye APR VC yitwaye neza maze itsinda Kepler VC amaseti 3-1 (26-24, 23-25, 31-29, 26-24).
Imikino y’umunsi wa gatatu irakomeza kuri uyu wa gatandatu, mu bagore: RRA izakina na RP Huye, Wisdom School ikine na Police WVC naho EAUR ikine na Ruhango WVC.
Mu bagabo, Gisagara VC izakina na KVC, Police VC ikine na RP Ngoma naho REG VC ikine na EAUR VC.