RRA WVC na Kepler WVC zitwaye neza ku munsi wa kabiri wa shampiyona y’u Rwanda ya volleyball mu bari n’abategarugori zitsinda EAUR WVC na Wisdom School.
Kuri uyu wa gatandatu tariki 26 Ukwakira 2024, shampiyona ya volleyball y’abari n’abategarugori yakomezaga hakinwa imikino y’umunsi wa kabiri (Round 2) yabimburiwe n’umukino Police WVC yatsinzemo APR WVC amaseti 3-2.
Saa saba nibwo imikino yatangiye muri Petit Stade i Remera, RRA WVC ikina na EAUR WVC.
Uyu mukino warangiye RRA WVC y’umutoza Mutabazi Elie itsinze EAUR WVC amaseti 3-1 (25-20, 25-20, 23-25, 25-17).
Nyuma y’uyu mukino hakurikiyeho umukino wahuje Kepler WVC na Wisdom School zombi ziri gukina shampiyona ku nshuro ya mbere.
Uyu mukino woroheye cyane Kepler WVC y’umutoza Siborurema Florien kuko yatsinze Wisdom School amaseti 3-0 (25-15, 25-16, 25-19).
Iyi yabaye intsinzi ya mbere ikipe ya Kepler WVC ibonye mu marushanwa kuva yatangira gukina shampiyona.
Shampiyona irakomeza kuri iki cyumweru tariki 27 Ukwakira 2024, APR WVC ikina na IPRC Huye naho Police WVC ikine na Ruhango WVC.