Umutoza w’Umudage Thomas Tuchel yatangajwe nk’umutoza mushya w’ikipe y’igihugu y’Ubwongereza kuri uyu wa gatatu tariki 16 Ukwakira 2024, akazatangira akazi muri Mutarama 2025.
Muri Nyakanga 2024 nibwo uwari umutoza w’Ubwongereza Gareth Southgate yeguye kuri uwo mwanya nyuma yo gutsindirwa ku mukino wa nyuma w’igikombe cy’Uburayi na Espagne.
Kuva icyo gihe, ikipe y’igihugu y’Ubwongereza yaragijwe Lee Carsley nk’umutoza w’agateganyo, akaba amaze gutoza iyi kipe imikino ine ndetse azakomeza kuyitoza kugeza uyu mwaka urangiye.
Thomas Tuchel w’imyaka 51 y’amavuko abaye umutoza wa gatatu ugiye gutoza ikipe y’igihugu y’Ubwongereza kandi atari Umwongereza nyuma ya Sven-Goran Eriksson na Fabio Capello.
Tuchel yahawe amasezerano y’amezi 18 (umwaka n’amezi atandatu), akazatangira imirimo yo gutoza Ubwongereza muri Mutarama 2025.
Ishyirahamwe ry’Umupira w’Amaguru mu Bwongereza ryatangaje ko Tuchel yemejwe nk’umutoza mushya w’ikipe y’igihugu mu cyumweru gishize ndetse yasinye amasezerano tariki 8 Ukwakira 2024.
Mu mirimo ye, Tuchel azungirizwa n’umwongereza Anthony Barry bakoranye mu ikipe ya Chelsea no mu ikipe ya Bayern Munich aherutse gutandukana nayo mu mpera z’umwaka ushize w’imikino.
Tuchel yatangiriye umwuga w’ubutoza mu ikipe ya Augsburg muri 2007, yerekeje muri Mainz 05 muri 2009, ubundi ajya mu ikipe ya Borussia Dortmund ari naho yatangiriye kubakira izina nyuma yo gutwarana n’iyi kipe igikombe cy’Igihugu cy’Ubudage.
Muri 2018, Tuchel yagiye muri Paris Saint Germain yo mu Bufaransa atwarana nayo ibikombe bya shampiyona bibiri ndetse ayigeza ku mukino wa nyuma wa UEFA Champions League.
Muri Mutarama 2021, Tuchel yerekeje muri Chelsea mu Bwongereza atwarana nayo UEFA Champions League, Igikombe cy’Isi cya Clubs, na UEFA Super Cup mbere yo kwirukanwa muri Nzeri 2022.
Tuchel yahise yerekeza mu ikipe ya Bayern Munich y’iwabo mu Budage muri 2023 asinya amasezerano y’imyaka ibiri gusa nyuma yo kunanirwa gutwara igikombe cya Shampiyona iyi kipe yarimaze imyaka 11 ikurikirana igitwara yahise imwirukana n’ubwo yaragifite umwaka umwe w’amasezerano