Patriots BBC na APR BBC zateye intambwe igana ku mukino wa nyuma wa BetPawa Playoffs nyuma yo gutsinda imikino ya kabiri mu mikino itanu iteganyijwe.
Kuri iki Cyumweru tariki 1 Nzeri 2024 muri Petit Stade Remera hakinwaga umukino wa kabiri wa 1/2 mu mikino ya kamarampaka muri basketball, betPawa Playoffs 2024.
Saa kumi nimwe z’umugoroba hakinwe umukino wahuje Kepler BBC na Patriots BBC.
Patriots BBC yatsinze umukino wa mbere yongeye gutsinda umukino wa kabiri ku manota 107-68.
Perry William Kiah ukinira Patriots BBC niwe watsinze amanota menshi muri uyu mukino, yatsinze amanota 22.
Kepler BBC iri gukina umwaka wayo wa mbere mu kiciro cya mbere, ikaba yaranabashije kujya mu makipe ane ya mbere muri shampiyona ya basketball yagombaga gukina imikino ya kamarampaka, BetPawa Playoffs 2024, irasabwa gutsinda imikino yose isigaye ngo igere ku mukino wa nyuma.
Patriots BBC irasabwa gutsinda undi mukino umwe ngo igere ku mukino wa nyuma.
Nyuma y’uyu mukino hahise hakurikiraho umukino wahuje REG BBC na APR BBC.
Umukino wa mbere wari warangiye APR BBC itsinze REG BBC amanota 92-91, ni umukino warugoye cyane ku mpande zombi.
REG BBC y’umutoza Ogoh Odaudu yaje mu mukino wa kabiri isabwa gutsinda ngo ibe yakwigarurira ikizere cyo gukomeza guhangana na APR BBC.
Umukino watangiye urimo kugarirana ku mpande zombi ku buryo agace ka mbere karangiye REG BBC iyoboye n’amanota 11-10 ya APR BBC.
Mu gace ka kabiri amakipe yombi yatangiye kwirekura bituma n’amanota yiyongera, aka gace karangiye REG BBC iyoboye n’amanota 20-17 ya APR BBC, igice cya mbere cy’umukino cyarangiye REG BBC iyoboye n’amanota 31 ku manota 27 ya APR BBC.
Mu gace ka gatatu, APR BBC yavuye inyuma maze itsinda REG BBC amanota 15-14 gusa ntibyari bihagije ngo iyirushe amanota kuko aka gace karangiye ari amanota 45 ya REG BBC ku manota 42 ya APR BBC.
Mu gace ka kane, REG BBC yagatangiye iri hasi maze bitiza umurindi APR BBC, APR BBC yagize amanota 61, REG BBC ifite amanota 49.
REG BBC yongeye kwibuka ko ikeneye insinzi maze nayo iva inyuma igira amanota 60, APR BBC igifite amanota 61.
N’ubwo umukino warukiri mubisi, REG BBC ntiyabashije kuguma guhangana kuko yahise itsindwa amanota ane bituma amanota atanu gusa ariyo aba ikinyuranyo kuri uyu mukino, warangiye REG BBC itsinzwe na APR BBC amanota 60-65.
Antino Alvalezes Jackson ukinira REG BBC niwe watsinze amanota menshi muri uyu mukino, yatsinze amanota 21.
APR BBC irasabwa gutsinda undi mukino umwe igahita igera ku mukino wa nyuma wa BetPawa Playoffs iheruka no kwegukana umwaka ushize.
Imikino ya gatatu itegerejwe tariki 4 Nzeri 2024, ikazabera muri BK Arena.
