Kuri uyu wa gatatu tariki 31 Nyakanga 2024 harakinwa imikino ya shampiyona ya basketball 2024 iri kugana ku musozo muri Lycee de Kigali.
Imikino itegerejwe kuri uyu munsi iratangira saa cyenda n’igice UGB ikina na K Titans.
Saa kumi n’ebyiri z’umugoroba haraba umukino utegerejwe na benshi uhuza Espoir BBC na Kepler BBC zinakurikiranye ku rutonde rwa shampiyona naho saa mbiri n’igice z’ijoro habe umukino w’ishiraniro uhuza REG BBC na APR BBC.
Ubundi muri shampiyona y’u Rwanda ya basketball buri kipe ikina imikino 18.
Uretse Inspired Generation yamaze kuzuza iyo mikino ntayindi kipe irayuzuza, Inspired Generation yari yazamutse uyu mwaka mu mikino 18 yarangije itsinze umukino umwe, ifite amanota 19, iri ku mwanya wa 9 bivuze ko yamaze gusubira mu kiciro cya kabiri.
Izindi kipe zifite imikino myinshi ni Orion BBC na Tigers BBC zifite imikino 17.
Patriots BBC iyoboye urutonde rwa shampiyona na APR BBC iyikurikiye zifite imikino 15 naho REG BBC ya gatatu ifite imikino 14.
Umukino uheruka guhuza APR BBC na REG BBC muri shampiyona wasize APR BBC itsinze REG BBC amanota 78-75.
Aya makipe yombi araza kongera gutana mu mitwe kuri uyu wa gatatu tariki 31 Nyakanga 2024.
