Kuri uyu wa mbere tariki 22 Nyakanga 2024, Komisiyo y’igihugu y’amatora mu Rwanda, NEC, yatangaje bya burundu ibyavuye mu matora ya Perezida wa Repubulika n’amatora y’abadepite.
Ni ubwa mbere mu Rwanda, amatora ya Perezida wa Repubulika n’amatora y’abadepite yarabaye akomatanyije, amatora yabaye tariki 14-16 Nyakanga 2024.
Tariki 14 Nyakanga 2024 hatoye Abanyarwanda batuye hanze y’u Rwanda (Abadiyasipora), abasaga 64,252 nibo batoye muri iki kiciro.
Tariki 15 Nyakanga 2024 hatoye Abanyarwanda batuye mu Rwanda, abatoye muri iki kiciro ni 8,832,593.
Tariki 16 Nyakanga 2024 hatoye abo mu nzego zihariye, aba bakaba batora abadepite bajya mu nteko ishinga amategeko mu buryo buziguye.
Hakurikijwe Raporo ya NEC, abanyarwanda bagomba gutora muri rusange ni 9,071,157, muri abo ariko abatoye ni 8,907,876 naho abatoye neza ni 8,895,739 bangana na 99.86% y’abagombaga gutora muri rusange.
Ibyavuye mu matora ya Perezida wa Repubulika.
NEC yatangaje ko Perezida KAGAME Paul ariwe watsindiye umwanya wa Perezida wa Repubulika y’u Rwanda ku nshuro ya kane yikurikiranya. Perezida Kagame akaba yaratowe ku kigero cya 99.18%.
Perezida Kagame yari yiyamamaje nk’umukandida wa FPR-Inkotanyi.
Undi mukandida kuri uyu mwanya yari HABINEZA Frank w’ishyaka rya Democratic Green Party of Rwanda. Habineza akaba ariwe wabaye uwa kabiri mu matora n’amajwi 44,479 ahwanye na 0.50%.
Undi mukandida yari MPAYIMANA Philippe, uyu akaba yariyamamaje nk’umukandida wigenga. Mpayimana yatowe ku kigero cya 0.32%.
Ibyavuye mu matora rusange y’abadepite.
Mu matora rusange y’abadepite, ishyaka rya FPR-Inkotanyi niryo ryahize andi yose, yatowe ku kigero cya 68.83% biyiha imyanya 37 mu nteko ishinga amategeko.
PL yatowe ku kigero cya 8.66% biyiha imyanya 5, PSD yatowe ku kigero cya 8.62% nayo biyiha imyanya 5 mu nteko ishinga amategeko.
Ishyaka rya DGPR-Green Party ryatowe ku kigero cya 4.56%, PDI yatowe ku kigero cya 4.61% na PS-Imberakuri yatowe ku kigero cya 4.51%, aya mashyaka yose yabonye imyanya ibiri mu nteko ishinga amategeko naho NSENGIYUMVA Janvier wiyamamaje nk’umukandida wigenga ntiyabashije kubona umwanya mu nteko ishinga amategeko nyuma yo gutorwa ku kigero cya 0.21%.
Ibyavuye mu matora y’abadepite mu buryo buziguye.
Abadepite batowe mu buryo buziguye ni aba bakurikira:
