Ikipe ya Police FC yo mu Rwanda yatomboye Sportif Constantine yo muri Algeria mu ijonjora ry’ibanze ry’igikombe gihuza amakipe yabaye aya kabiri iwayo muri Afurika, CAF Confederations Cup.
Muri tombola yabaye kuri uyu kane tariki 11 Nyakanaga 2024, ikabera mu Misiri ku Kicaro gikuru k’Impuzamashyirahamwe y’Umupira w’Amaguru muri Afurika, CAF, yasize Police FC yatwaye igikombe cy’Amahoro izakina na CS Constantine yabaye iya gatatu muri shampiyona ya Algeria mu mwaka ushize w’imikino.
Ikipe izakomeza hagati ya Police FC na CS Constantine izahura n’ikipe izakomeza hagati ya Nsoatreman FC yo muri Ghana na TP Elect Sport yo muri Chad mu ijonjora rya kabiri rya CAF Confederations Cup.
Muri Tombola ya CAF Confederations Cup yari amakipe 52 gusa 12 ya mbere ku rutonde rwa CAF yahise ahabwa itike yo kuzakina ijonjora rya kabiri, ibi bivuze ko amakipe 40 yarasigaye ariyo yatomboranywe mu ijonjora rya mbere.
