Kuri uyu wa gatanu tariki 17 Gicurasi 2024 harakinwa imikino ya nyuma ya shampiyona ya Volleyball mu Rwanda (Playoffs) mu bagabo no mu bari n’abategarugori, ni imikino itegerejwe kubera muri Ecole Belge de Kigali (Gisozi).
Mu bari n’abategarugori ikipe ya APR WVC yabaye iya mbere iracakirana na Ruhango WVC yabaye iya kane ku rutonde rwa shampiyona naho Police WVC yabaye iya kabiri icakirane na RRA WVC yabaye iya gatatu ku rutonde rwa shampiyona.
Mu bagabo, ikipe ya REG VC yabaye iya mbere ku rutonde rwa shampiyona irakina na APR VC yabaye iya kane naho Police VC yabaye iya kabiri irakina na Kepler VC yabaye iya gatatu ku rutonde rwa shampiyona.
Imibare iravuga iki kuri playoffs mu bagabo?
Umukino utegerejwe ukomeye cyane ni ugomba guhuza Police VC na Kepler VC, aya ni amakipe aziranye cyane yakunze guhura kuva uyu mwaka w’imikino watangira ari nabwo Kepler VC yashinzwe kuko iri mu mwaka wayo wa mbere.
Police VC na Kepler VC zimaze gukina imikino 5 y’amarushanwa kuva tariki 11 Nzeri 2023 ubwo zahuraga bwa mbere mu irushanwa rya Tax Payers, ni umukino warangiye Kepler VC itsinze amaseti 3-2 (22-25, 25-17, 25-18, 21-25, 15-12). Iri rushwanwa ryaje kwegukanwa na APR VC.
Mu mukino wa kabiri wahuje aya makipe hari muri CAVB Zone 5 Championship, tariki 14 Nzeri, 2023, icyo gihe Police VC yatsinze amaseti 3-1 (25-19, 20-25, 25-19, 25-21) ndetse yaje no kwegukana iri rushanwa.
Mu mikino 2 ya shampiyona Police VC yakinnye na Kepler VC yose yarangiye Police VC iyitsinze. Umukino ubanza warangiye Police VC itsinze amaseti 3-0 (25-19, 25-11, 25-23) naho uwo kwishyura urangira Police VC itsinze amaseti 3-1 (25-14, 25-17, 21-25, 25-23).
Kepler VC yongeye kunyuzamo maze itsinda Police VC ku mukino wa nyuma w’irushanwa ryo kwibuka Padiri KAYUMBA Emmanuel ribera muri Groupe Scolaire Officiel de Butare (Indatwa n’Inkesha School), Kepler VC yatwaye iki gikombe biyoroheye nyuma yo gutsinda amaseti 3-0 (27-25, 25-21, 25-20).
Muri rusange mu mikino 5 imaze guhuza aya makipe muri uyu mwaka w’imikino, Police VC yatsinzemo imikino 3 naho Kepler VC itsinda imikino 2, mu mibare ikipe ya Police VC niyo ihabwa amahirwe yo kugera ku mukino wa nyuma.
Undi mukino ni ugomba guhuza ikipe ya REG VC na APR VC. Aya makipe amaze guhura mu mikino 3 y’amarushanwa muri uyu mwaka w’imikino.
Muri izo nshuro, REG VC yatsinzemo inshuro 2 naho APR VC itsinda umukino umwe. REG VC yarangije ari iya mbere ku rutonde rwa shampiyona naho APR VC irangiza ari iya kane. Hakurikijwe imibare, REG VC niyo ifite amahirwe yo kugera ku mukino wa nyuma.
Inzu y’imikino (Gymnasium) ya Ecole Belge de Kigali (Gisozi) igiye kwakira imikino y’amarushanwa ku nshuro ya mbere kuva yakuzura. Iyi gymnasium ikaba ifite ubushobozi bwo kwakira abafana bari hagati 1500-2000.
Imikino yose iraba kuri uyu wa gatanu guhera saa 14:30, APR WVC ikina na Ruhango VC.
