Police FC yabonye insinzi ya mbere muri shampiyona mu mikino yo kwishyura, Gorilla FC itsindirwa i Rubavu biyishyira mu mazi abira, APR FC yongera amahirwe yo gutwara igikombe; ibyaranze umunsi wa 24 wa shampiyona y’u Rwanda y’umupira w’amaguru, Primus National League.
Imikino y’umunsi wa 24 yatangiye ku wa gatanu tariki 9 Werurwe 2024. Etoile de l’Est yafashe Kiyovu Sports maze iyitsindira i Ngoma igitego 1-0, Etincelles itsinda Mukura VS ibitego 3-1, AS Kigali itsinda Musanze FC igitego 1-0 naho Amagaju anganya na Bugesera FC igitego 1-1.
Ku wa gatandatu imikino yarakomeje ari nabwo habaye umukino karundura wahuje ikipe ya Rayon Sports n’ikipe ya APR FC. Uyu mukino warangiye Rayon Sports itsinzwe ibitego 2-0.
Undi mukino wabaye kuri uyu munsi wo ku wa gatandatu wahuje ikipe ya Muhazi United n’ikipe ya Sunrise FC. Uyu mukino warangiye Muhazi United yitwaye neza itsinda igitego 1-0.
Mu mikino 24, Muhazi United imaze gutsinda imikino 7. Muri iyi mikino 7 Muhazi United yatsinze harimo imikino 5 yatsinze amakipe yo mu Ntara y’Iburasirazuba arimo Etoile de l’Est yatsinze igitego 1-0 mu mukino ubanza n’ibitego 2-0 mu mukino wa kwishyura, Sunrise FC yatsinze ibitego 2-1 mu mukino ubanza n’igitego 1-0 mu mukino wo kwishyura, yatsinze kandi Bugesera FC igitego 1-0.
Imikino y’umunsi wa 24 yakomeje kuri iki cyumweru tariki 10 Werurwe 2024. Mu karere ka Rubavu kuri stade Umuganda ikipe ya Marines yari yakiriye Gorilla FC. Muri uyu mukino, Marines FC yitwaye neza maze itsinda Gorilla FC ibitego 2-1.
Gutsindwa kwa Gorilla FC kwayishyize mu mazi abira kuko kuri ubu ariyo kipe ibanziriza iya nyuma ku rutonde rw’agateganyo rwa shampiyona.
Undi mukino warutegerejwe na benshi wabereye kuri Kigali Pele Stadium wahuzaga ikipe ya Police FC n’ikipe ya Gasogi United. Police FC yaritaratsinda umukino n’umwe kuva imikino yo kwishyura yatangira, mu mikino 8 yaherukaga gukina muri shampiyona yatsinzwemo imikino 6, inganya imikino 2.
Gasogi United niyo yabanje kubona izamu ku munota wa 22 w’umukino ku gitego kiza cyatsinzwe na Khamis Hakim, yarobye neza umuzamu RUKUNDO Onesme ubwo yari yataye izamu.
Police FC yahise itangira kwataka ngo irebe ko yakwishyura maze ku munota wa 37 w’umukino ku mupira mwiza kapiteni NSHUTI Dominique Savio yarahawe na HAKIZIMANA Muhadjili ashyiraho umutwe biba igitego 1-1 ari nako igice cya mbere cyarangiye.
Mu gice cya kabiri, Police FC yagarukanye imbaraga n’ubundi maze ibona igitego ku munota wa 58 w’umukino nyuma y’akazi gakomeye kari gakozwe na BIGIRIMANA Abedi maze HAKIZIMANA Muhadjili aterekaho itako riboneza mu izamu.
Gasogi United yagerageje kwishyura ariko umuzamu RUKUNDO Onesme ayibera ibamba harimo nk’uburyo kapiteni wayo Idrisse yagerageje gutungura umuzamu ariko umupira umuzamu awukuramo neza.
Nyuma y’uyu munsi wa 24 wa Primus National League, APR FC irayoboye n’amanota 58, ikurikirwa na Rayon Sports n’amanota 45, Musanze FC ni iya gatatu n’amanota 44, Mukura VS ni iya kane n’amanota 39 naho Police FC ni iya gatandatu n’amanota 36.
Bugesera FC iri ku mwanya wa 14 n’amanota 23, Gorilla FC iri ku mwanya wa 15 n’amanota 23 na Etoile de l’Est iri ku mwanya wa 16 ari nawo wanyuma n’amanota 19 ni amwe mu makipe agomba kurwanira kuguma mu kiciro cya mbere.
