Mu mpera z’icyumweru hakomezaga imikino ya shampiyona ya basketball mu bagabo hakinwa umunsi wa 9, REG BBC na UGB zitwara neza naho Inspired Generation ikomeza kugorwa.
Imikino ku munsi wa 9 yabereye mu nzu y’imikino (Gymnasium) yo muri Lycee de Kigali (LDK) kuva saa 18:00 z’umugoroba nk’uko abakunzi ba basketball bamaze kubimenyera.
UGB yihereranye Inspired Generation izamutse uyu mwaka maze iyitsinda amanota 85-76. IYAKAREMYE Emmanuel wa UGB niwe mukinnyi witwaye neza muri uyu mukino nyuma yo gutsinda amanota 22 mu mukino, agakora rebounds 6, agatanga imipira 3 yavuyemo amanota (Assists).
Uyu mukino ukirangira hahise hakurikiraho umukino wahuje Orion BBC na REG BBC, uyu mukino woroheye cyane ikipe ya REG BBC kuko yatsinze n’amanota 106-63. Pitchou Manga wa REG BBC niwe witwaye neza muri uyu mukino; yatsinze amanota 23, akora rebounds 10, atanga assists 3 muri uyu mukino.
Imikino yakomeje ku wa gatandatu ku munsi wa 10 tariki 2 Werurwe 2024, ni imikino yabereye muri BK Arena ari nabwo bwa mbere imikino ya shampiyona yarigiye kuhabera kuva shampiyona y’uyu mwaka w’imikino yatangira.
Saa 15:00 z’umugoroba habanje umukino wa Kigali Titans ikina na Espoir BBC. TURATSINZE Olivier wa Espoir nyuma yo gutsinda amanota 28 muri uyu mukino, agakora rebounds 2, agatanga assists 3 yafashe Espoir BBC gutsinda amanota 81-60.
Nyuma y’uyu mukino wari umwanya wo kuryoherwa n’umukino wa Kepler BBC izamutse mu kiciro cya mbere muri uyu mwaka n’ikipe imaze kumenyerwa muri shampiyona ya Patriots BBC.
Patriots BBC yahise iboneraho no gushimira MUGABE Aristide wakiniye iyi kipe igihe kigera ku myaka 8 maze habikwa nimero ya ’88’ yambaraga muri iyi kipe. Uyu ni umuco ubundi usanzwe umenyerewe muri shampiyona yo muri Leta Zunze Ubumwe z’Amerika NBA.
MUGABE Aristide yakiniye ikipe ya Patriots BBC kuva 2015 kugeza umwaka ushize ubwo yayivagamo maze akerekeza muri Kepler BBC nk’umutoza ariko kandi unakina.
Uyu mukino waje kurangira ikipe ya Kepler itsinzwe amanota 56-84. NDIZEYE Dieudonne bakunze kwita Gaston niwe mukinnyi witwaye neza muri uyu mukino kuko yatsinze amanota 21, akora rebounds 8, atanga assists 4.
