Andreas Iniesta wamenyekanye mu ikipe ya FC Barcelona y’iwabo muri Espagne yakinnye umukino we w’igihumbi gusa igitangaje ntakarita y’umutuku yigeze ahabwa muri iyo mikino yose.
Iniesta yujuje umukino we w’igihumbi kuri uyu wa gatanu tariki 1 Werurwe 2024 mu mukino ikipe ye ya Emirates Club yatsinzwemo na Ajman ibitego 2-0. Hari mu mukino w’umunsi wa 15 wa shampiyona yo muri Eminati Zunze Ubumwe z’abarabu, UAE Pro League.
Iniesta yatangiriye gukina mu ikipe y’abato ya FC Barcelona izwi nka La Masia ubundi aza no kwerekeza mu ikipe nkuru muri 2002. Aha ni naho yamaze igihe kinini kuko yahavuye muri 2018. Iyi kipe yayikiniye imikino 674, ayitsindira ibitego 57, atanga imipira 136 yavuyemo ibitego, atwarana nayo ibikombe 35.
Nyuma yaje kwerekeza muri Vissel Kobe yo mu Buyapani aho yayikiniye kugeza muri 2023 mbere yo kwerekeza muri Emirates Club akinira kuri ubu.
Mu mikino 1000 Iniesta y’ujuje nk’umukinnyi wabigize umwuga ku myaka 39 y’amavuko yatsinze ibitego 104, atanga imipira 192 yavuyemo ibitego, yahawe amakarita y’umuhondo 78 ariko ntakarita itukuru yigeze ahabwa na rimwe haba guhabwa amakarita abiri y’umuhondo mu mukino umwe cyangwa guhabwa ikarita itukura ako kanya.
