Cristiano Ronaldo ukinira Al-Nassr yahanwe gusiba umukino umwe no kwishyura asaga £4,210 (Miliyoni 6 zirenga z’amanyarwanda) azira gukora ibiteye mu ruhame.
Hari ku Cyumweru tariki 25 Gashyantare 2024 ubwo ikipe ya Al-Nassr yatsindaga Al-Shabab ibitego 3-2 mu mukino w’umunsi wa 21 wa shampiyona yo muri Saudi Arabia, Saudi Pro League. Muri uyu mukino Cristiano yanatsinze igitego ku munota wa 21 kuri penaliti.
Muri uyu mukino wabereye kuri Al-Shabab Stadium abafana b’iyi kipe bumvikanye baririmba ‘Messi’ ubwo Cristiano yarabageze imbere. Byatumye Cristiano ahagarara maze akora ikimenyetso yakoresheje intoki gisanishwa n’ibiterasoni.
Gukora ibiterasoni mu ruhame ntibyemewe, ibi nibyo byagendeweho Cristiano Ronaldo w’imyaka 39 afatirwa ibihano kubera kurenga kuri iryo tegeko nk’uko akanama gashinzwe imyitwarire k’ishyirahamwe ry’umupira w’amaguru muri Saudi Arabia kabitangaje ku mugoroba wo kuri uyu wa gatatu.
Cristiano akaba agomba gusiba umukino umwe ndetse akishyura ibihumbi 20 by’amafaranga akoreshwa muri Saudi Arabia (Saudi riyals).
Aya mashusho ya Cristiano akora iki kimenyetso ntiyigeze yerekanwa kuri televiziyo ahubwo amashusho yafashwe n’abafana niyo yamutamaje.
Al-Nassr ubu iri ku mwanya wa kabiri ku rutonde rw’agateganyo rwa Shampiyona aho irushwa amanota 7 n’ikipe ya mbere ya Al-Hilal iragaruka mu kibuga kuri uyu wa kane itana mu mitwe na Al-Hazm.
