Umufaransa ukinira ikipe ya Chelsea yo mu Bwongereza Christopher Nkunku yongeye kuvunika aho agomba kumara hanze y’ikibuga ibyumweru biri hagati ya bitatu na bine.
Imvune ya Christopher Nkunku yemejwe n’umutoza wa Chelsea Mauricio Pochettino gusa ntiyigeze ayivugaho byinshi.
Ubwo yari mu kiganiro n’itangazamakuru cyo kwitegura umukino Chelsea izakiramo Leeds United muri FA Cup kuri uyu wa gatatu, Pochettino yagize ati;”Twumvise ejo (Ku wa mbere) ko Nkunku yavunitse. Ntituzi igihe yavunikiye.”
Pochettino abajijwe igihe Nkunku azamara hanze y’ikibuga yagize ati;”Ibyumweru bitatu cyangwa bine. Turizera ko bitazaba byinshi.”
Nkunku ukina asatira izamu yageze mu ikipe ya Chelsea mu ntangiriro z’uyu mwaka w’imikino aguzwe miliyoni £52 avuye mu ikipe ya RB Leipzig yo mu Budage maze asinya amasezerano y’imyaka 6.
Uyu yari umwe mu bari bitezweho gufasha iyi kipe gusa imvune zikomeje kumugora kuko uyu musore kuva yagera muri Chelsea amaze gukina imikino 10 gusa mu marushanwa yose, yatsinze ibitego 2 mu minota 394 amaze gukina.
N’ubwo kandi Nkunku yageze muri Chelsea muri Nyakanga 2023, yayikiniye umukino wa mbere w’amarushanwa mu Ukuboza 2023 kuko yari yahise agira ikibazo k’imvune mu ivi mu ntangiriro z’umwaka w’imikino.
