Abakurikira Lionel Messi kuri Instagram bagabanutseho miliyoni hadaciye iminsi yujuje abamukurikira barenga miliyoni 500 kuri Instagram.
Hari hashize iminsi 2 Lionel Messi yujuje abamukurikira (followers) barenga miliyoni 500 ku rubuga rwa Instagram, ni agahigo kari kihariwe na Cristiano Ronaldo ukiyoboye abakurikirwa n’abantu benshi kuri Instragram aho akurikirwa n’abarenga miliyoni 622.
Bitunguranye ariko kuri uyu munsi mu masaha y’igitondo iyo usuye Lionel Messi kuri Instagram ubona ko afite abamukurikira miliyoni 499 nyamara yari yaramaze kuzuza miliyoni 500, bivuze ko abarenga miliyoni baba bavuye mu bakurikira Lionel Messi kuri Instagram.
Lionel Messi wamenyekanye mu ikipe ya FC Barcelona yo muri Espagne na Paris Saint Germain yo mu Bufaransa no mu ikipe y’igihugu y’Argentine, ubu ni umukinnyi wa Inter Miami yo muri Leta Zunze Ubumwe z’Amerika.
Inter Miami ya Lionel Messi iheruka gukina na LA Galaxy muri shampiyona yo muri Leta Zunze Ubumwe z’Amerika, Major League Soccer, umukino warangiye amakipe yombi anganyije igitego 1-1, ndetse ni igitego cyatsinzwe na Lionel Messi ku ruhande rwa Inter Miami.
Kuri ubu Inter Miami niyo iyoboye urutonde rw’agateganyo rwa Major League Soccer n’amanota 4 mu mikino 2 mu gice k’iburasirazuba.
