Ikipe ya Everton yo mu Bwongereza yari yarakuweho amanota 10 ku bwo kurenga ku mabwiriza agenga uburyo ikipe y’injiza n’uburyo isohora muri shampiyona y’Ubwongereza (Profit and Sustainability Rules ‘PSR’) ariko yagabanyirijwe ibihano agirwa amanota 6 nyuma yo kujuririra iki gihano.
Mu Ugushyingo 2023 nibwo iperereza ryemeje ko ikipe ya Everton yarenze ku mabwiriza ya PSR maze ikurwaho amanota 10.
Everton yari ku mwanya wa 14 ku rutonde rw’agateganyo rwa shampiyona yahise yisanga ku mwanya wa 19.
Nyuma y’uko ubujurire bwa Everton bwemewe, yagabanyirijwe ibihano maze ivanwa ku manota 10 ahubwo ikurwaho amanota 6.
Nyuma yo kugabanyirizwa ibihano, Everton yahise ifata umwanya wa 15 ku rutonde rwa shampiyona ivuye ku mwanya wa 17. Yavuye ku manota 21 maze igira amanota 25 binayigabanyiriza igitutu cyo kumanuka mu kiciro cya kabiri kuko irusha Luton Town iri mu zimanuka amanota 5.
N’ubwo byagenze uku ariko, Everton iracyafite ibirego bishobora gutuma yongera gukurwaho amanota. Muri Mutarama uyu mwaka nibwo hazamutse ibirego ko ishobora kuba yarongeye kurenga ku mabwiriza ya PSR mu gihe k’imyaka itatu y’imikino kugeza muri 2022-23.
Ibi birego nabyo biramutse biyihamye ishobora kongera kugira amanota ikurwaho. Iperereza rirakomeje, umwanzuro waryo ukazasohoka tariki 8 Mata 2024. Hazaba habura imikino 6 ya shampiyona.
Ubundi PSR ni iki?
PSR ni amabwiriza yashyizweho muri 2015-16 agenga uko yo mu Bwongereza abaho hirindwa ko yagwa mu bihombo ahubwo agakorera mu nyungu.
Aya mabwiriza avuga ko ikipe iba itagomba guhomba amafaranga arenga miliyoni £105 (Pounds) mu gihe k’imyaka 3 cyangwa miliyoni £35 ku mwaka w’imikino. Everton yarengeje aya mafaranga kuko yahombye miliyoni £125 mu myaka 3.
Ikipe irenze kuri aya mabwiriza rero iba igomba guhabwa ibihano nk’uko Everton byayigendekeye kuko yayarenzeho.
