Amakipe akomeye ku mugabane w’i Burayi arimo Liverpool, Bayern Munich na Real Madrid yose afite umutoza wa Bayer Leverkusen Xabi Alonso ku rutonde rw’abatoza yifuza.
Mu Ugushyingo 2022 nibwo ikipe ya Bayer Leverkusen yahaye akazi umutoza Xabi Alonso ngo ayitoze avuye mu ikipe y’iwabo muri Espagne Real Sociedad aho yatozaga ikipe ya kabiri.
Mu mwaka we wa mbere, Xabi Alonso ntiyabashize gushyira Bayer Leverkusen mu myanya 4 ya mbere muri shampiyona y’Ubudage Bundesliga kuko yarangije ku mwanya wa 6 n’amanota 50 abasha kubona itike yo gukina imikino ya UEFA Europa League.
Mu mwaka ukurikiyeho w’imikino wa 2023-24 nibwo Xabi Alonso n’ikipe bitwaye neza bidasanzwe kuko kugeza aka kanya Bayer Leverkusen iyoboye urutonde rw’agateganyo rwa Bundesliga irusha Bayern Munich ya kabiri amanota 8 ndetse yarayitsindiye.
Si ibi gusa kuko Bayer Leverkusen ubu yageze muri 1/8 k’irangiza cya Europa League nyuma yo kuzamuka ari iya mbere mu itsinda ndetse itsinze imikino yose kuko yarifite amanota 18 kuri 18.
Bayer Leverkusen kandi iri muri 1/2 k’igikombe k’igihugu DFB-Pokal aho igomba guhura na Düsseldorf tariki 3 Mata 2024.
Kuva uyu mwaka w’imikino watangira, Bayer Leverkusen ya Xabi Alonso ntiratsindwa umukino numwe mu bikombe byose. Imaze gukina imikino 32, yatsinzemo imikino 28, inganya imikino 4. Yamaze gufata Bayern Munich ku gahigo ko kumara imikino myinshi itaratsindwa ndetse mu gihe umukino ukurikiyeho itawutsindwa izahita inyura kuri Bayern Munich kuri ako gahigo.
Ku rundi ruhande, Bayern Munich ntiyorohewe namba hamwe n’umutoza wayo Thomas Tuchel. Iyi kipe yarimaze imyaka 11 yikurikiranya itwara Bundesliga ubu bisa nkaho bitazayikundira. Bayern Munich yamaze kuvamo mu gikombe k’igihugu DFB-Pokal ndetse yatsinzwe umukino ubanza wa 1/8 k’irangiza muri UEFA Champions League.
Uku kutitwara neza gutuma amakuru avuga ko umutoza Thomas Tuchel agomba kurangiza uyu mwaka w’imikino agahita atandukana na Bayern Munich nk’uko ibitangazamakuru byo mu Budage bibivuga.
Mu Bwongereza, mu ikipe ya Liverpool nayo umutoza wayo w’umudage Jurgen Klopp yamaze gutangaza ko azatandukana n’iyi kipe uyu mwaka w’imikino nurangira.
Amakuru avuga ko aya makipe yombi afite Xabi Alonso w’imyaka 42 ku rutonde rw’abatoza yifuza ko yazayatoza. Aya makipe yombi Alonso akaba yaranayakiniye ubwo yari akiri umukinnyi, akaba yarakinaga mu kibuga hagati.
Real Madrid yo muri Espagne nayo ivugwa mu makipe yaba yifuza kuzana uyu mutoza n’ubwo Carlo Ancelotti aherutse kongera amasezerano azamugeza muri 2025.
FC Barcelona izatandukana n’umutoza Xavi Hernandez nyuma y’uyu mwaka w’imikino nayo ivugwa mu makipe yifuza kugera amajanja Xabi Alonso nubwo ngo bigoye cyane ko uyu yanakiniye Real Madrid.
