Kuri uyu wa gatatu nibwo hakinwaga agace ka kane ka Tour du Rwanda kavaga Karongi kerekeza Rubavu, ni intera ya kilometero 93 maze kegukanwa n’umubiligi ukinira Soudal-Quick-Step Devo Team LECERF William Junior.
Saa 11:30 nibwo abasiganwa bahagurutse mu karere ka Karongi berekeza mu karere ka Rubavu.
Rurangiranwa muri uyu mukino witabiriye Tour du Rwanda ku nshuro ya kabiri yikurikiranya Chris Froome ukinira Israel-Premier Tech yayoboye bagenzi be mu bilometero 13 bya mbere gusa siko byaje gukomeza kuko mu bilometero 18 abakinnyi bongeye kujya mu gikundi.
Mu bilometero 44, abakinnyi bayoboye isiganwa, bari bamaze gushyira intera y’amasegonda 55’’ hagati yabo na Peloton.
Isiganwa ryaje kurangira umubiligi LECERF William Junior ariwe wegukanye irushanwa akoresheje amasaha abiri, iminota 19 n’amasegonda 22. Umunya-Colombia RESTREPO Jhonatan watwaye agace ka gatatu niwe waje ku mwanya wa kabiri naho Umufaransa Simon Julien ukinira TotalEnergies aza ku mwanya wa gatatu.
MUGISHA Moise ukinira Java-Innovotec Pro Team niwe munyarwanda wongeye kwitwara neza kurusha abandi banyarwanda aza ku mwanywa wa 18 anganya ibihe n’uwatwaye isiganwa, akarushwa amasegonda arendwi n’uwa mbere ku rutonde rusange.
Kuri uyu wa kane harakinwa agace ka kane ka Tour du Rwanda. Ni agace kazakinirwa mu karere ka Musanze kakazasorezwa mu Kinigi ahasanzwe habera ibirori byo kwita Izina. Aka gace kazaba kagizwe n’ibilometero 13.