Mu gihe umutoza David Moyes akomeje kutitwara neza muri West Ham United ashobora kwirukanwa maze iyi kipe igahita izana umutoza Thomas Tuchel nawe utamerewe muri Bayern Munich mu Budage.
Kuva Thomas Tuchel yafata ikipe ya Bayern Munich ntabwo yigeze agira icyo ayifasha gikomeye nk’uko byari byitezwe, uwavuga ko ahubwo yanasubiye hasi ntiyaba abeshye.
Ibi binashingirwa no ku mikino ikomeye akomeje gutakaza, Bayern Munich yarimaze imyaka 11 yikurikiranya yegukana shampiyona y’Ubudage Bundesliga gusa nk’ubu bigaragara ko bigoranye kuko ikipe ya Bayer Leverkusen ubu iyoboye urutonde rwa shampiyona irusha Bayern amanota 5 ndetse mu mukino baherutse guhuramo yayitsindiye ibitego 3-0.
Iyi nsinzwi yahise inakurikirwa n’insinzwi ya Lazio mu mukino ubanza wa UEFA Champions League. Ibirenze ibi, ikipe ya Bayern Munich itsindwa yarushijwe cyane, ibi rero bikaba byerekeza umutoza Thomas Tuchel ku kuba yakwirukanwa muri iyi kipe.
Ku rundi ruhande, umutoza David Moyes wa West Ham United nawe ntabwo yorohewe, n’ubwo yahaye iyi kipe igikombe cya Europa Conference League mu mwaka ushize w’imikino, akanarangiza ku mwanya wa 8 muri shampiyona y’Ubwongereza Premier League gusa kuri ubu ntabwo yorohewe.
Kuva umwaka wa 2024 watangira, West Ham United ntamukino n’umwe iratsinda. West Ham United iheruka gutsinda tariki 28 Ukuboza 2023 ubwo yatsindaga Arsenal ibitego 2-0, kuva icyo gihe iyi kipe yanganyije imikino 3 muri shampiyona, itsindwa ibiri harimo n’uwo yanyagiwe n’ikipe ya Arsenal ibitego 6-0. West Ham United kandi yakuwemo na Bristol City yo mu kiciro cya kabiri mu gikombe cya FA Cup.
Mu makuru dukesha ikinyamakuru ‘Sportslens’ avuga ko mu gihe ikipe ya West Ham United yakwirukana umutoza David Moyes amaso agomba guhita ahangwa Thomas Tuchel utoza Bayern Munich nawe utamerewe neza mu ikipe ye.
