Kuri uyu wa gatandatu tariki 27 Mutarama 2024 ubwato bwa ‘Icon of the Seas’ bwa mbere bunini ku isi mu gutwara abantu bwatangiye urugendo rw’iminsi irindwi (7) buhagurutse Miami muri Leta ya Florida muri Leta Zunze Ubumwe z’Amerika bwerekeza mu Burasirazuba bwa Caraibes/Caribbean.
Ubu bwato bukaba bwaruzuye butwaye miliyari 2 z’amadorari y’Amerika, bwatwaye imyaka 3 ngo bwubakwe, bupima toni 250,800, bukaba bufite uburebure bwa metero 365, ibyumba bigera ku 2,805, bufite ubushobozi bwo gutwara abagenzi bagera ku 7,600, bukaba ari ubwa kompanyi ya Royal Caribbean Group yo muri Leta Zunze Ubumwe z’Amerika gusa bukaba bwarubatswe na kompanyi y’abadage ariko ikorera muri Finland yitwa Meyer Turku akaba ari naho bwubakiwe.
‘Icon of the Seas’ iteje impungenge ku bidukikije kuko isohora ibyuka bihumanya ikirere. Nk’ubundi bwato, ubu nabwo bukoresha ibitoro bya LNG (Liquefied Natural Gas) ishobora kugereranywa n’umwuka uba wahinduwe amazi. Ibi bitoro rero bishobora gutera ibyuka bya Methane kandi ibi binyabutabire bigira ingaruka mbi ku kirere.
Byemezwa ko ibyuka bya Methane byangiza ikirere no kurusha ibyuka bya gaz carbonique (Carbon dioxide).
Bryan Comer ukuriye ibijyanye n’ingendo zo mu mazi (Marine Programme) mu kigo mpuzamahanga gishinzwe ingendo zitangiza, International Council on Clean Transportation (ICCT) avuga ko iyi ari intambwe igana mu nzira mbi.
Yagize ati;”Dukwiye kumenya ko gukoresha ibitoro bya LNG mu ngendo zo mu mazi bibyara ibyuka byangiza ikirere inshuro 120% kurusha gukoresha ibitoro by’amavuta (marine gas oil).”
Royal Caribbean ariko iteganya ko muri 2035 izaba ifite ubwato butarekura ibyuka mu kirere na bike (net-zero).
Mu birori ubu bwato bwitiwemo izina byabaye ku wa kane tariki 25 Mutarama 2024, kizigenza Lionel Messi ukinira ikipe ya Inter Miami n’ikipe y’igihugu ya Argentine yari mu bitabiriye ibi birori.
