Perezida wa Leta Zunze Ubumwe za Amerika (USA), Joe Biden, yatangaje ko azohereza abayobozi batanu bamuhagararira mu muhango w’irahira rya Perezida wa Repubulika Iharanira Demokarasi ya Congo, Félix Tshisekedi Tshilombo.
Urukiko rushinzwe kurinda Itegeko Nshinga rwa RDC tariki ya 9 Mutarama 2024 rwemeje bidasubirwaho ko Tshisekedi yatsinze amatora y’Umukuru w’Igihugu yabaye ku ya 20 n’iya 21 Ukuboza 2023.
Uru rukiko rwamenyesheje Abanye-Congo n’inshuti zabo ko ruzarahiza Tshisekedi tariki ya 20 Mutarama 2024, atangire kuyobora manda ya kabiri. Ni umuhango uzabera muri stade Martyrs i Kinshasa.
Byitezwe ko ibihugu, byaba ibyo muri Afurika no hanze yaho, bizohereza abantu babihagararira muri uyu muhango. Perezida Biden we yamaze kwemeza ko azohereza batanu, nk’uko ibiro bye, White House, byabitangaje.
Azahagararira Biden barimo Ambasaderi wa USA muri RDC, Lucy Tamlyn; Umunyamabanga wa Leta wungirije ushinzwe ububanyi na Afurika, Mary Catherine Phee n’Umuyobozi wungirije w’Ibiro bishinzwe ububanyi na Afurika, Monde Muyangwa.
Umuyobozi Mukuru wungirije w’Ikigo Millenium Challenge Corporation gitanga inkunga, Chidi Blyden na we azaba ari muri iri tsinda; bose bayoborwe n’Umuyobozi Mukuru w’ikigo mpuzamahanga cya USA gishinzwe gushora imari mu mishinga y’ibihugu biri mu nzira y’iterambere, Scott Nathan.
USA ihanze amaso RDC nk’umufatanyabikorwa ukomeye mu iterambere, by’umwihariko mu mishinga y’ubucukuzi bw’amabuye y’agaciro muri iki gihugu cyo ku mugabane wa Afurika isa n’iyikubiwe n’u Bushinwa.
Maurice Carney uyobora umuryango w’Abanyamerika witwa ‘Friends of the Congo’ (Inshuti za Congo) aherutse gutangariza CBS News ko igihugu cyabo cyakurikiraniye hafi amatora yo muri RDC kubera ko ibyavuyemo byari ingenzi kugira ngo ubufatanye hagati y’impande zombi bwongerwe.
