Bwa mbere mu mateka umunyarwanda agiye gusifura umukino mu gikombe cy’Afurika kiri kubera muri Cote d’Ivoire nk’umusifuzi mukuru w’umukino. UWIKUNDA Samuel niwe ugiye guca aka gahigo.

Imyaka ibaye 6 UWIKUNDA Samuel w’imyaka 36 asifura imikino nyafurika. Yasifuye mu mikino ya CHAN 2023 yabereye muri Algeria, imikino itandukanye muri CAF Champions League na CAF Confederations Cup, n’indi mikino myinshi itandukanye mu marushanwa mpuzamahanga.

UWIKUNDA Samuel yatangiye gusifura muri 2012 asifura mu kiciro cya kabiri, yaje kuzamurwa mu kiciro cya mbere muri 2014, yemezwa n’Ishyirahamwe ry’Umupira w’Amaguru ku Isi (FIFA) nk’umusifuzi mpuzamahanga muri 2017.

Uwikunda araza kuyobora umukino uhuza Guinée équatoriale na Guinée Bissau nk’umusifuzi wo mu kibuga hagati. Uyu uraza kuba ari umukino wa 2 w’amatsinda mu gikombe cy’Afurika mu itsinda rya mbere.

Ibi bimugira umusifuzi wa mbere w’umunyarwanda ubashize kubikora mu mateka y’umupira w’amaguru mu Rwanda no ku isi muri rusange.