Umucamanza wo muri Amerika yabaye ahagaritse itegeko rishya ritavugwaho rumwe ryo muri Texas urebye ribuza abagore gukuramo inda muri iyo leta.
Umucamanza wo ku rwego rw’akarere Robert Pitman yemeye ubusabe bw’ubutegetsi bwa Perezida Joe Biden bwo kubuza ishyirwa mu bikorwa ry’iryo tegeko mu gihe kwemerwa kwaryo bicyamaganwa.
Iryo tegeko ryateguwe rinemezwa n’abanyapolitiki bo mu ishyaka ry’abarepubulikani bo muri leta ya Texas. Ribuza abagore bo muri Texas gukuramo inda nyuma y’ibyumweru bitandatu byo gutwita.
Ibiro bya Perezida w’Amerika bya White House byashimye icyo cyemezo cy’umucamanza, bivuga ko ari intambwe y’ingenzi itewe mu gusubizaho uburenganzira abagore bemererwa n’itegekonshinga.
Jen Psaki, ushinzwe gutangaza amakuru muri White House, yagize ati: “Ubu urugamba ni bwo rugiye rwatangira, haba muri Texas no muri za leta nyinshi zo muri iki gihugu aho uburenganzira bw’abagore ubu burimo kugabwaho igitero”.
Abategetsi bo muri Texas bahise bajuririra icyemezo cy’umucamanza, bicira inzira ko urugamba rushobora kuba rugiye gukomeza kugereka mu nkiko.
Umucamanza Pitman, w’akarere ka Austin, yanditse igitekerezo kiri ku mpapuro 113 ko kuva iryo tegeko ryajyaho ku itariki ya mbere y’ukwezi kwa cyenda, “mu buryo bunyuranyije n’amategeko abagore babujijwe kugenga ubuzima bwabo mu buryo burinzwe n’itegekonshinga”.
Yagize ati: “Uru rukiko ntiruzemera undi munsi w’uku kuvutswa kubi k’uburenganzira nk’ubu bw’ingenzi”.
Ikigo Whole Woman’s Health, gifite amavuriro muri Texas, cyavuze ko kiri muri gahunda zo gusubukura gukuramo inda “mu gihe cya vuba aha gishoboka”.
Ariko umuryango Texas Right to Life urwanya gukuramo inda, washinje abacamanza “kwita ku ruganda [urwego] rwo gukuramo inda”, usaba ko habaho “kumvwa kurimo ubutabera” mu cyiciro gikurikiyeho.
Ni ubwa mbere Texas ihuye n’imbogamizi yo mu rwego rw’amategeko kuva iryo tegeko ryatangira gukurikizwa.
Ubutegetsi bwa Perezida Biden bwatanze ikirego mu rukiko nyuma yuko urukiko rw’ikirenga, rwiganjemo abakomeye ku bya kera badashaka impinduka, rwanze kubuza leta ya Texas gushyira mu bikorwa iryo tegeko.
Minisiteri y’ubutabera y’Amerika yatanze ubusabe bwihutirwa bwo kubuza ko iryo tegeko rikurikizwa mu gihe ikomeje kwiyambaza inzira yo mu rwego rw’ubucamanza.
Bwana Biden, wo mu ishyaka ry’abademokarate, yavuze ko iryo tegeko ari “igitero kitigeze kibaho mbere” cyagabwe ku burenganzira bw’abagore.
Ariko Guverineri wa leta ya Texas Greg Abbott yararishyigikiye avuga ati: “Uburenganzira bwa mbere bw’ingenzi cyane ni ubuzima ubwabwo”.
