Ni kenshi abakinnyi barangiza gukina umupira w’amaguru nk’ababigize umwuga ubundi bagakomeza mu nzira y’ubutoza. Uru nirwo rugendo umwongereza Wayne Rooney wakiniye amakipe arimo Manchester United na Everton yahisemo gusa guhirwa nk’umutoza bikomeje kugorana ugereranyije n’uko yahiriwe ari umukinnyi.
Nk’umukinnyi, Wayne Rooney yatangiriye mu ikipe y’abato ya Everton nyuma yerekeza mu ikipe nkuru muri 2002, yaje kwerekeza muri Manchester United aho yayikiniye kuva muri 2004 – 2017 mbere yo gusubira muri Everton, ubundi yerekeza muri D.C. United muri Leta Zunze Ubumwe z’Amerika aho yavuye yerekeza muri Derby County yo mu kiciro cya kabiri mu Bwongereza ndetse ninaho yasoreje gukina umupira w’amaguru nk’uwabigize umwuga tariki ya 26 Ugushyingo 2021.
Byumwihariko Wayne Rooney yabaye igihangange ubwo yakiniraga Manchester United nka rutahizamu, iyi kipe yayikiniye imikino 559, ayitsindira ibitego 253, atanga imipira 145 yavuyemo ibitego ndetse niwe uyoboye urutonde rw’abatsindiye iyi kipe ibitego byinshi mu mateka mu gihe k’imyaka 13 yayimazemo.
Akimara gusezera ku gukina ruhago, Rooney yahise atangira umwuga w’ubutoza maze ahera mu ikipe ya Derby County aho yamaze imyaka 2 ubundi yerekeza muri Leta Zunze Ubumwe z’Amerika mu ikipe ya D.C. United aho yamaze umwaka umwe mbere yo kugirirwa ikizere cyo kuzanwa mu ikipe ya Birmingham City itarihagaze neza mu kiciro cya kabiri mu Bwongereza.
Wayne Rooney yagizwe umutoza wa Birmingham City tariki ya 11, Ukwakira 2023 ndetse yahise asinya amasezerano azamugeza muri Kamena 2027. N’ubwo yaraje yitezweho byinshi ariko siko byaje kugenda kuko insinzi muri iyi kipe byagoranye. Mu mikino 13 amaze gutoza iyi kipe, Rooney yatsinze imikino 2, anganya imikino 3, atsindwa imikino 8 ibi bimuha ijanisha rya 15% ry’insinzi nk’umutoza mukuru.
Wayne Rooney w’imyaka 38 y’amavuko unafatanya n’ikipe y’abatoza irimo Ashley Cole na John O’Shea ubu ikipe ya Birmingham City bayigejeje ku mwanya wa 19 mu makipe 24 n’amanota 27, n’umwenda w’ibitego 8, umusaruro utari mwiza ushyira mu kangaratete akazi ka Wayne Rooney.
