Brahim Abdelkader Díaz w’imyaka 24 y’amavuko ukinira ikipe ya Real Madrid yemeye gukinira ikipe y’igihugu ya Maroc aho gukinira ikipe y’igihugu ya Espagne yakiniye mu makipe y’abato yose.
Ubundi Brahim Díaz yavukiye muri Espagne mu mugi wa Malaga, nyina n’ubundi ni umunya-Espagne uvuga muri uwo mugi witwa Patricia Díaz naho se Sufiel Abdelkader Mohand akomoka muri Maroc ari nabyo bituma Brahim Díaz afite ubwenegihugu bubiri, ubwa Espagne n’ubwa Maroc.
Díaz ni umwana w’imfura mu muryango w’abana 5 aho afite bashiki be 4. Yatangiye gukina umupira w’amaguru muri 2006 ubwo yakinaga mu ikipe y’abato ya Malaga CF, yaje kuyivamo muri 2013 maze yerekeza mu ikipe y’abato ya Manchester City. Tariki ya 21 Nzeri 2016 nibwo bwa mbere yakiniye ikipe nkuru ya Manchester City. Mu mikino 15 yakiniye Manchester City kuva muri 2016-2019 yayitsindiye ibitego 2.
Muri Mutarama 2019 nibwo Brahim Díaz yaguzwe na Real Madrid yo muri Espagne kuri miliyoni €17.3 ahita asinya amasezerano y’imyaka 6 n’igice muri iyi kipe nyuma ariko yaje gutizwa mu ikipe ya AC Milan aho yayikiniye imikino 124 ayitsinda ibitego 18, atanga imipira 15 yavuyemo ibitego.
Uyu musore yakiniye ikipe y’igihugu ya Espagne mu batarangeje imyaka 17 no mu batarengeje 19, nyamara nyuma biba ingorabahizi kuba yahamagarwa mu ikipe y’igihugu nkuru ari nabyo byatumye afata umwanzuro wo kwemera gukinira ikipe y’igihugu ya Maroc aho gukinira Espagne.
Brahim Díaz ukinisha ukuguru kw’ibumoso ukina nka rutahizamu uca ku mpande cyangwa umukinnyi wo mu kibuga hagati ariko wataka izamu araza mu ikipe y’igihugu ya Maroc asangamo abandi bakinnyi bakomeye nka Achraf Hakimi, Yassine Bounou, Noussair Mazraoui, Sofyan Amrabat, Azz-Edini Ounahi, Sofyan Boufal, Hakim Ziyech, Youssef En-Nesyri n’abandi.
