Wayne Rooney wabaye umukinnyi gusa kuri ubu akaba ari umutoza nyuma yo gutandukana na DC United yo muri Leta Zunze Ubumwe z’Amerika aravugwa mu ikipe ya Birmingham City yo mu kiciro cya kabiri mu Bwongereza.

Birmingham City yamaze gutangaza ko yatandakunye n’uwari umutoza mukuru wayo John Eustace; ugomba kumusimbura biravugwa ko ari Wayne Rooney nawe wamaze gutandukana na DC United yaramazemo umwaka umwe.

Rooney ni umutoza w’imyaka 37 y’amavuko wamenyekanye nk’umukinnyi ubwo yakiniraga ikipe ya Manchester United yamazemo imyaka 13. Wayne Rooney yatangiriye umwuga wo gutoza mu ikipe ya Derby County yari mu kiciro cya kabiri mu Bwongereza muri 2021, iyi kipe yayimazemo umwaka umwe mbere yo kwerekeza muri Leta Zunze Ubumwe z’Amerika mu ikipe ya DC United.

Biravugwa ko ubwumvikane bugeze kure hagati ya Birmingham City na Wayne Rooney ndetse amakuru akavuga ko aricyo cyatumye Rooney atandukana na DC United. Kuri ubu Birmingham City iri ku mwanya 6 n’amanota 18, yizigamye ibitego 4 mu mikino 11 imaze gukina muri shampiyona y’ikiciro cya kabiri mu Bwongereza.