Rutahizamu w’Umubiligi Eden Hazard w’imyaka 32 y’amavuko nyuma yo gutandukana na Real Madrid yamaze gutangaza ko asezeye ku gukina umupira w’amaguru nk’uwabigize umwuga.
Nyuma y’uko muri Real Madrid bitamuhiriye Eden Hazard yatandukanye n’iyi kipe maze yisanga ntakipe afite. Hazard yabonye ubusabe bwinshi buvuye mu makipe yo ku mugabane w’Iburayi arimo ay’iwabo mu Bubiligi, amakipe yo muri Saudi Arabia n’ayo muri Leta Zunze Ubumwe z’Amerika nayo ntiyarasinziriye nyamara aya yose yayateye umugongo maze asezera ruhago.
Eden Hazard yavutse tariki 7 Mutarama 1991, avukira La Louviere mu Bubiligi. Yatangiye gukinira umupira w’amaguru mu ikipe y’abato ya RS Braine yo mu Bubiligi, akomereza mu AFC Tubize nayo yo mu Bubiligi mbere y’uko ajya mu ikipe y’abato ya LOSC Lille yo mu Bufaransa muri 2005.
Muri 2007 nibwo Eden Hazard yagiye mu ikipe nkuru ya LOSC Lille aho yamaze imyaka 5 kugeza muri 2012. Mu mikino 194 yakiniye Lille yayitsindiye ibitego 50, atanga imipira 53 yavuyemo ibitego ari nabyo byatumye ikipe ya Chelsea yo mu Bwongereza imubenguka maze imugura kuri miliyoni £32 aho yahembwaga ibihumbi £100 ku cyumweru ndetse asinya amasezerano y’imyaka 5.
Mu ikipe ya Chelsea Hazard yahubakiye ibigwi mu myaka igera kuri 7 yahamaze. Mu mikino 352 yakiniye Chelsea yayitsindiye ibitego 110, atanga imipira 92 yavuyemo ibitego. Arikumwe n’ikipe ya Chelsea, Eden Hazard yatwaye ibikombe 2 bya shampiyona y’Ubwongereza Premier League, UEFA Europa League 2, igikombe kimwe cya FA Cup n’igikombe kimwe cya Carabao Cup.
Muri 2019 nibwo Eden Hazard yerekeje mu ikipe ya Real Madrid yo muri Espagne kuri miliyoni £150 aho yaraje kuba umusimbura wa Cristiano Ronaldo wari umaze kwerekeza muri Juventus ariko kandi yari aje no kuba umukinnyi ngenderwaho muri iyi kipe. Hazard mu ikipe ya Real Madrid ntibyamuhiriye kuko yagowe cyane n’imvune naho agarukiye kubona umwanya wo gukina muri iyi kipe bikomeza kugorana kugeza ubwo muri 2023 impande zombi zemeranyije gusesa amasezerano hakibura umwaka umwe.
Eden Hazard yakiniye ikipe ya Real Madrid imikino 76 ayitsindira ibitego 7, atanga imipira 12 yavuyemo ibitego mu myaka 4 yahamaze. N’ubwo atakinaga ariko ntibikuraho ko yatwaranye ibikombe n’iyi kipe bigera ku 8 birimo UEFA Champions League, Ibikombe 2 bya shampiyona ya Espagne La Liga, igikombe kimwe cya EUFA Super Cup n’ibikombe 2 bya Supercopa de España.
Umubiligi Eden Hazard yakiniye y’igihugu y’Ububiligi ndetse yayibereye kapiteni kuva muri 2015 kugeza muri 2022 ubwo yasezeraga mu ikipe y’igihugu. Mu ikipe y’igihugu Hazard yatsinze ibitego 33 atanga imipira 36 yavuyemo ibitego. Mu mateka y’ikipe y’igihugu yUbubiligi Hazard aza ku mwanya wa kabiri mu bayitsindiye ibitego byinshi nyuma ya Romelu Lukaku.
Gusezera kuri ruhago Eden Hazard yabinyujije ku rubuga rwe rwa Instagram aho mu nteruro ndende yashimiraga abafana be ndetse ntiyibagiwe n’amakipe yakiniye aho yagiraga ati;”Mu gihe nakinaga nagize amahirwe yo guhura n’abatoza bakomeye n’abakinnyi bakomeye. Mwarakoze ku bw’ibihe byiza, nzabakumbura. Munyemerere kandi nshimire amakipe nakiniye harimo LOSC Lille, Chelsea na Real Madrid ntibagiwe n’ishyirahamwe ry’umupira w’amaguru mu Bubiligi ku bwo kumpamagara mu ikipe y’igihugu.”
Muri ubu butumwa yakomeje ashimira umuryango we, inshuti ze, abajyanama be n’abamubaye hafi bose haba mu bihe byiza no mu bibi. Yarangije ashimira abafana bose bamuteye ingabo mu bitugu ndetse avuga ko uyu ari umwanya w’umuryango we ndetse ari igihe cyo gukora ibindi bintu bishya.
Eden Hazard wakinaga nka rutahizamu uca ku mpande asezeye kuri ruhago ku myaka 32 y’amavuko, yakinnye imikino 623 atsinda ibitego 167. Uyu ni umwe muri barutahizamu beza babayeho mu binyecumi 3 bishize ndetse niwe mukinnyi uheruka gutsindira ikipe ya Chelsea byibuze ibitego 20 muri shampiyona imwe ya Premier League.
