Nyuma y’uko ikipe ya Chelsea itandukanye n’umuherwe ukomoka mu Burusiya Roman Arkadievitch Abramovich muri Werurwe 2022 yaje kubona umuherwe mushya Todd Boehly muri Gicurasi 2022. Todd Boehly ntako atagize ngo ashore muri iyi kipe amafaranga menshi ashoboka ngo ikipe ikomere gusa byaragoranye, kugeza nanubu ikipe ya Chelsea ntirasubira ku gasongero. Icyakurikiye ibi ni uguhananuka mu biciro kw’abakinnyi b’iyi kipe bisa nko kuyihombera.
Kuva umunyamerika Todd Boehly yagera muri Chelsea amaze gushora arenga miliyari £1 mu kugura abakinnyi, mu mezi 15 amaze muri iyi kipe amaze kugura abakinnyi bagera kuri 31 bashyashya binjira muri iyi kipe.
N’ubwo Chelsea yaguze abakinnyi gusa umusaruro ukomeje kuba iyanga ari nabyo byatumye benshi mu bakinnyi bayo bagabanuka mu biciro ugereranyije na mbere y’uko ifatwa na Boehly.
Uru ni urutonde rw’abakinnyi 5 ba Chelsea bamaze guhananuka mu biciro kuva umuherwe Todd Boehly yagera muri iyi kipe ndetse abakinnyi 4 muri aba bageze muri iyi kipe nyuma yaho uyu muherwe ayigezemo:
- Reece James
Reece James ni umwongereza w’imyaka 23 y’amavuko ukina nka myugariro ndetse kuri ubu niwe kapiteni w’ikipe ya Chelsea. Ubwo Boehly yageraga muri Chelsea, Reece James yarahagaze agaciro ka miliyoni €65, kuri ubu amaze kugabanukaho €10 kuko ageze kuri €55. James niwe mukinnyi rukumbi ugaragara kuri uru rutonde watanze umuherwe Todd Boehly muri Chelsea kuko yageze mu ikipe nkuru muri 2018.
2. Wesley Fofana
Fofana ni umufaransa w’imyaka 22 y’amavuko ukina nka myugariro. Fofana yageze muri Chelsea avuye muri Leicester City, uyu mukinnyi yaje ahagaze ku gaciro ka miliyoni €55 gusa kuri ubu agaciro ke kamaze kugabanukaho miliyoni €15 kuko ageze kuri miliyoni €40.
3. Marc Cucurella
Cucurella ni myugariro ukomoka muri Espagne w’imyaka 25 y’amavuko. Uyu mukinnyi yageze mu ikipe ya Chelsea avuye muri Brighton & Hove Albion. Aza mu ikipe ya Chelsea yarahagaze ku gaciro ka miliyoni €35 gusa kuri ubu agaciro ke kamaze kugabanukaho miliyoni €7 aho ageze ku gaciro ka milliyoni €28.
4. Mykhaïlo Petrovytch Mudryk
Mudryk ni rutahizamu w’imyaka 22 y’amavuko, yaje mu ikipe ya Chelsea avuye muri Shakhtar Donetsk y’iwabo muri Ukraine. Mudryk aza mu ikipe ya Chelsea yarahagaze agaciro ka miliyoni €50 gusa kuri ubu agaciro ke kamaze kugabanukaho miliyoni €5 kuko ageze kuri miliyoni €45.
5. Raheem Sterling
Sterling ni umwongereza ukina nka rutahizamu waje mu ikipe ya Chelsea avuye muri Manchester City. Sterling w’imyaka 28 y’amavuko yageze mu ikipe ya Chelsea ari ku gaciro ka miliyoni €55 gusa kuri ubu amaze kugabanukaho miliyoni €5 kuko ageze kuri miliyoni €50.
Uru nirwo rutonde rw’abakinnyi 5 ba Chelsea bamaze kugabanuka mu biciro ku buryo bugaragara byose bigashyirwa ku mutwe w’umuherwe Todd Boehly kuko nyuma y’uko ageze muri iyi kipe itarabasha kongera gusubira ku gasongera yahozeho ku bwa Roman Abramovich.
