Arsenal yatsinze Manchester City muri shampiyona y’Ubwongereza Premier League byaherukaga kuba muri 2015, ni umukino yatsinze igitego 1-0 cyatsinzwe na Gabriel Martinelli.
Wari umukino w’umunsi wa 8 wa Premier League, Arsenal yari yakiriye Manchester City kuri Emirates Stadium mu mukino wasifuwe na Michael Oliver.
Arsenal itozwa na Mikel Arteta yakinnye uyu mukino idafite abarimo Jurrien Timber na Bukayo Saka bombi bafite ibibazo by’imvune naho ikipe ya Manchester City itozwa na Pep Guadiola yakinnye umukino idafite abarimo Zack Steffen na Kevin De Bruyne bose bafite ibibazo by’imvune n’umukinnyi wo mu kibuga hagati Rodri wasibye umukino kubera yahawe ikarita itukura.
Igice cya mbere cy’umukino cyarangiye amakipe yombi anganya 0-0 gusa mu gice cya kabiri nibwo Arsenal yabonye igitego cyatsinzwe na Gabriel Martinelli winjiya mu kibuga asimbuye, ni igitego cyabonetse ku munota wa 86 w’umukino.
Arsenal yaherukaga gutsinda Manchester City muri Premier League muri 2015 ndetse ibaye inshuro ya mbere umutoza Mikel Arteta atsinda Pep Guadiola muri Premier League. Mikel Arteta yaje muri Arsenal avuye mu ikipe ya Manchester City aho yari yungirije Pep Guadiola.
Nyuma y’uyu mukino Arsenal yahise ifata umwanya wa 2 n’amanota 20 mu mikino 8, yizigamye ibitego 10 naho Manchester City yahise ijya ku mwanya wa 3 n’amanota 18, yizigamye ibitego 11 ni mu gihe urutonde rwa shampiyona ruyobowe na Tottehnam Hotspur.
Mu yindi mikino yakinwaga muri Premier League kuri iki cyumweru
Brighton & Hove Albion 2-2 Liverpool
West Ham United 2-2 Newcastle United
Wolves 1-1 Aston Villa
