Ni umuco ko muri shampiyona y’Ubwongereza Premier League hatangwa ibihembo by’ukwezi aho hahembwa umukinnyi witwaye neza, umutoza witwaye neza, save nziza y’ukwezi n’igitego kiza cy’ukwezi.

Premier League yamaze gutangaza abazahatanira ibi bihembo by’ukwezi kwa Nzeri barimo abakinnyi n’abatoza.

Abakinnyi bazahatanira igihembo cy’umukinnyi mwiza w’ukwezi kwa Nzeri muri Premier League:

Julian Alvarez

Uyu ni umusore w’imyaka 23 y’amavuko ukinira ikipe ya Manchester City asatira izamu. Mu kwezi gushize kwa Nzeri yatsinze ibitego 2, atanga imipira 2 yavuyemo ibitego ndetse arema uburyo burindwi bwavuyemo ibitego.

Jarrod Bowen

Bowen ni umwongereza w’imyaka 26 y’amavuko ukinira ikipe ya West Ham United nka rutahizamu. Mu kwezi kwa Nzeri yatsinze ibitego 3 mu mashoti 5 yateye agana mu izamu ndetse yabashije kwaka umupira umukinnyi bahanganye (duels won) inshuro zigera kuri 18.

Pedro Neto

Neto ni umunya-Portugal w’imyaka 23 y’amavuko ukina nka rutahizamu uca ku mpande mu ikipe ya Wolverhampton Wanderers. Muri Nzeri, Neto yatsinze igitego 1, atanga imipira 3 yavuyemo ibitego ndetse arema amahirwe 8 yavuyemo ibitego.

Mohamed Salah

Salah ni umunyamisiri w’imyaka 31 ukinira ikipe ya Liverpool nka rutahizamu. Salah yatsinze ibitego 2, atanga imipira 2 yavuyemo ibitego ndetse arema uburyo 11 bwavuyemo ibitego mu kwezi kwa Nzeri.

Heung-Min Son

Son w’imyaka 31 ukomoka muri Koreya Y’epfo akinira ikipe ya Tottehnam Hotspur akaba ari na kapiteni (Captain) wayo. Mu kwezi kwa Nzeri, Son yatsinze ibitego 6 mu mashoti 9 yateye mu izamu ndetse yaremye uburyo 3 bwavuyemo ibitego.

Kieran Trippier

Trippier ni umwongereza w’imyaka 33 ukina nka myugariro wo ku mpande mu ikipe ya Newcastle United. Mu kwezi gushize, Trippier yatanze imipira 4 yavuyemo ibitego, arangiza imikino 2 ntagitego kinjiye mu izamu arinze ndetse arema uburyo 13 bwavuyemo ibitego.

Abo nibo bakinnyi 7 bahataniye igihembo cy’umukinnyi w’ukwezi kwa Nzeri muri Premier League naho abatoza bahataniye iki gihembo bagera kuri 5 aribo:

Mikel Arteta

Arteta ni umutoza ukomoka muri Esipanye (Espagne) w’imyaka 41 y’amavuko utoza ikipe y’Arsenal. Mu mikino 4 yakinnye muri Nzeri yatsinze imikino 3 maze undi mukino arawunganya; yatsinze Manchester United, Everton na Bouremouth maze anganya na Tottehnam Hotspur.

Unai Emery

Emery ni umutoza ukomoka muri Esipanye (Espagne) w’imyaka 51 y’amavuko utoza Aston Villa. Mu mikino 4 yo muri Nzeri, Emery yatsinze imikino 3 maze atsindwa 1. Yatsinze Crystal Palace, Chelsea na Brighton & Hove Albion maze atsindwa na Liverpool.

Eddie Howe

Howe ni umutoza w’umwongereza w’imyaka 45 y’amavuko utoza ikipe ya Newcatle United. Howe yatsinze imikino 3 mu mikino 4 yakinnye muri Nzeri maze atsindwa umukino 1. Yatsinze Brentford, Luton Town na Sheffield United ubundi atsindwa na Brighton & Hove Albion.

Jurgen Klopp

Klopp ni umutoza w’umudage w’imyaka 56 y’amavuko utoza ikipe ya Liverpool. Mu mikino 4, Klopp na Liverpool ye batsinzemo imikino 3 maze batsindwa umukino umwe. Yatsinze Aston Villa, Wolverhampton Wanderers na West Ham United gusa atsindwa na Tottehnam Hotspur.

Ange Postecoglou

Postecoglou ni umutoza ukomoka muri Australia w’imyaka 58 y’amavuko utoza ikipe ya Tottehnam Hotspur. Mu mikino 4 yakinnye muri Nzeri, yatsinzemo imikino 3, anganya umukino 1. Yatsinze Luton Town, Brentford na Liverpool hanyuma anganya n’Arsenal.

Aba nibo batoza bahatanira igihembo cy’umutoza mwiza w’ukwezi muri Premier League. Mu bindi bihembo bitangwa harimo igitego kiza cy’ukwezi n’umuzamu wakuyemo umupira neza (Save) mu kwezi.

Mu bitego bihanganiye igihembo cy’ukwezi harimo igitego Hannibal Mejbri ukinira Manchester United yatsinze Brighton & Hove Albion tariki ya 16 Nzeri, igitego Jhon Duran wa Aston Villa yatsinze Crystal Palace tariki 16 Nzeri, igitego Leandro Trossard w’Arsenal yatsinze Everton tariki ya 17 Nzeri, igitego Callum Hudson-Odoi wa Nottingham Forest yatsinze Burnley tariki 18 Nzeri, igitego Bruno Fernandes wa Manchester United yatsinze Burnley tariki 23 Nzeri, igitego Miguel Almiron wa Newcastle United yatsinze Burnley tariki 30 Nzeri, igitego Joachim Andersen wa Crystal Palace yatsinze Manchester United tariki 30 Nzeri n’igitego Julian Alvarez wa Manchester City yatsinze Wolverhampton Wanderers kuri kufura (coup-franc) tariki 30 Nzeri.

Muri save zihatanira igihembo cy’ukwezi harimo iyakozwe n’umuzamu Jordan Pickford ukinira Everton ubwo bakinaga na Sheffield United tariki 2 Nzeri, iyakozwe n’umuzamu Guglielmo Vicario ukinira Tottehnam Hotspur ubwo bakinaga na Burnley tariki 2 Nzeri, iyakozwe n’umuzamu Ederson Santana de Moraes ukinira Manchester City ubwo bakinaga na West Ham United tariki ya 16 Nzeri, iyakozwe n’umuzamu David Raya ukinira Arsenal ubwo bakinaga na Tottehnam Hotspur tariki ya 24 Nzeri, iyakozwe n’umuzamu Robert Sanchez ukinira Chelsea ubwo bakinaga na Aston Villa tariki ya 24 Nzeri n’iyakozwe n’umuzamu Alisson Becker ukinira Liverpool ubwo bakinaga na Tottehnam Hotspur tariki 30 Nzeri 2023.

Muri rusange muri uku kwezi kwa Nzeri muri Premier League hakinwe iminsi 4 ya shampiyona.