Ikipe ya Young African Sports Club yo muri Tanzania yongeye kubona itike y’amatsinda ya CAF Champions League nyuma y’imyaka 25 imaze gukuramo Al Merrikh yo muri Sudan ku giteranyo k’ibitego 3-0.
Ikipe ya Young African SC yakuyemo Al Merrikh yo muri Sudani imaze kuyitsinda ibitego bigera kuri 3-0. Umukino ubanza wakiniwe mu Rwanda kuri Kigali Pele Stadium warangiye Al Merrikh itsinzwe na Young African ibitego 2-0.
Al Merrihk yo muri Sudan yakiriye mu Rwanda kubera umutekano muke uri muri Sudan bityo yiyambaje kwakirira mu Rwanda.
Umukino wo kwishyura wakiniwe kuri Azam Complex warangiye Young African SC itsinze ikipe ya Al Merrikh igitego 1-0, ni igitego cyatsinzwe na Clement Mzize ku munota wa 66. Imikino yombi irangira ari igiteranyo k’ibitego 3-0 mu mikino yombi maze ibona itike y’amatsinda ya CAF Champions League.
Young African SC yashinzwe mu 1935 ibarizwa i Dar es Salaam muri Tanzania yongeye kubona itike yo kujya mu matsinda ya CAF Champions League nyuma y’imyaka 25. Young African SC yaherukaga gutsindwa ku mukino wa nyuma wa CAF Confederations Cup mu mwaka ushize w’imikino.
Si Young African SC yo muri Tanzania yonyine yabonye itike y’amatsinda ya CAF Champions League kuko na Simba SC yayibonye nyuma yo gusezerera Power Dynamos yo muri Zambia ku giteranyo k’ibitego 3-3 ariko igakomeza kubera igitego cyo hanze.
Singida Big Stars Club ikinamo umunyarwanda Kagere Meddie yo ntiyahiriwe kuko yakuwemo na Future FC yo mu Misiri ku giteranyo k’ibitego 4-1 mu mikino yombi, bahataniraga itike yo kujya mu matsinda ya CAF Confederations Cup.
