Muri iyi minsi ya nyuma y’icyumweru mu ntara y’Iburasirazuba hakinirwaga irushanwa rya volleyball rya Kirehe Open Tournament ryegukanywe na Police VC mu bagabo na RRA WVC mu bari n’abategarugori.
Kirehe Open Tournament ni irushanwa ngarukamwaka ry’umukino wa volleyball ribera mu karere ka Kirehe mu ntara y’Iburasirazuba. Kuri iyi nshuro ryari riteganyijwe kuri uyu wa gatandatu no kuri iki cyumweru tariki ya 23-24 Nzeri 2023.
Iri rushanwa ryitabiriwe n’amakipe 11 ari mu byiciro bibiri; amakipe 7 yo mu bagabo n’amakipe 4 yo mu bari n’abategarurogi. Mu bagabo harimo Kirehe VC ari nayo yakiriye irushanwa, Police VC, Kepler, Gisagara VC, REG VC, APR VC na KVC naho mu bari n’abategarugori harimo Police WVC, APR WVC, RRA WVC na IPRC Kigali.
Kuri uyu wa gatandatu hakinwaga imikino yo mu matsinda yasize ikipe ya Gisagara VC, Police VC, Kirehe VC na APR VC zisanze muri 1/2 k’irangiza mu bagabo naho Police WVC na RRA WVC zisanga ku mukino wanyuma mu bagore.
Muri 1/2, ikipe ya Police VC yatsinze APR VC biyoroheye amaseti 3-0 maze igera ku mukino wa nyuma ityo, ku rundi ruhande ikipe ya Gisagara VC nayo yihanije Kirehe VC yari mu rugo maze iyitsinda amaseti 3-0 nayo igera ku mukino wa nyuma.
Habanje umukino wa nyuma mu bari n’abategarugori warangiye RRA WVC yari ifite igikombe giheruka yongera kwisubiza icyubahiro maze itsinda Police WVC amaseti 3-0 igikombe igisubirana ityo.
Mu bagabo ikipe ya Gisagara VC yari ifite igikombe giheruka ntiyahiriwe kuko ku mukino wanyuma yaje gutsindwa na Police VC amaseti 3-1 maze Police VC yegukana igikombe ityo.
Police VC ikiri nshyashya ibifashijwemo n’abakinnyi barimo KWIZERA Eric, NTAGENGWA Olivier, IRAKOZE Alain, SIBOMANA Placide bakunze kwita Madison, NTANTETERI Ivan Crispin n’abandi yabashije kwegukana iki gikombe ku nshuro yayo ya mbere.
