Mu mukino ubanza w’ijonjora rya kabiri rya CAF Confederations Cup ikipe ya Al Hilal Benghazi yo muri Libya yari yakiriyemo Rayon Sports yo mu Rwanda kuri Kigali Pele Stadium warangiye amakipe yombi aguye miswi y’igitego 1-1.
Uyu mukino wakabaye warakiniwe muri Libya tariki ya 15 Nzeri 2023 gusa uza gusubikwa bitewe n’ibiza byibasiye igihugu cya Libya ari nabyo byatumye Al Hilal Benghazi isaba ko yakwakirira umukino wayo mu Rwanda kuri Kigali Pele Stadium, ibi byahawe umugisha n’impuzamashyirahamwe y’umupira w’amaguru muri Afurika CAF ari nabwo umukino wakinwaga uyu munsi.
Al Hilal Benghazi yashyizeho amabwiriza nk’ikipe yari yakiriye yavugaga ko ntabafana bagomba kuba bari kuri uyu mukino, hakaza abantu mbarwa batari muri staff ya Rayon Sports ndetse hashyiraho ko uyu mukino ugomba kurebwa n’abanyamakuru batarenga 50. Al Hilal kandi yasabye ko televiziyo ishaka kwerekana uyu mukino yakwishyura ibihumbi 100 by’amadorali y’Amerika ubwo ni arenga miliyoni 100 z’amanyarwanda gusa habuze n’imwe itanga aya mafaranga.
Umutoza wa Rayon Sports yari yabanje mu kibuga umuzamu HAKIZIMANA Adolphe, SERUMOGO Ali yugariraga ku ruhande rw’iburyo, GANIJURU ISHIMWE Elie yugarira ku ruhande rw’ibumoso, Kapiteni RWATUBYAYE Abdul na MITIMA Isaac bari mu mutima w’ubwugarizi, KALISA Rashid, ARUNA Musa Madjariwa, LUVUMBU Hertier Nzinga na MVUYEKURE Emmauel bari mu kibuga hagati naho Joackiam OJERA na Musa Essenu bashakira ikipe ya Rayon Sports ibitego.
Umukino waruteganyijwe gutangira saa 18:00 z’umugoroba watinze gutangira biturutse ku kuba habanje gukorwa igenzurwa ngo harebwe ko ikipe ya Rayon Sports itaba yarengeje umubare w’abantu yari yemerewe kuri uyu mukino.
Mbere y’umukino impande zombi zifatanyije mu kunamira abahitanywe n’ibiza biherutse kwibasira igihugu cya Libya.
Mu gice cya mbere amakipe yombi yagerageje gusatira izamu ariko birananirana harimo nk’uburyo bwahushijwe na MITIMA Isaac na coup-franc yatewe neza na KALISA Rashid ku ikosa ryari rimaze gukorerwa Ojera ariko umupira uca ku ruhande rw’izamu byose ku ruhande rwa Rayon Sports ariko kandi Al Hilal nayo yahushije igitego cyari cyabazwe ku munota wa mbere w’umukino. Igice cya mbere cyarangiye ari 0-0 ku mpande zombi.
Mu gice cya kabiri cy’umukino ku mupira warugiye guterwa neza na Musa Essenu myugariro wa Al Hilal Benghazi yawukozeho n’intoki maze umusifuzi ahita atanga penaliti ku ikipe ya Rayon Sports. Ku munota wa 54 LUVUMBU Hertier Nzinga yateye Penaliti neza maze umuzamu wa Al Hila ntiyamenya aho umupira unyuze igitego cya mbere cya Rayon Sports kiba kirabonetse.
Amakipe yombi yakomeje gukina maze mu gihe Rayon Sports yariri gukabakaba ku nsinzi y’umukino isosi yaje kugwamo inshishi maze ku munota wa 84 w’umukino ku mupira waruzamuwe neza uvuye mu ruhande rw’iburyo uwitwa Azou Elmalmi ashyiraho umutwe neza maze umuzamu wa Rayon Sports HATEGEKIMANA Bonheur wari winjiye mu kibuga asimbuye ku munota wa 22 nyuma y’uko HAKIZIMANA Adolphe wabanje mu kibuga agiriye imvune ntiyamenya aho umupira unyuze Al Hilal yishyura igitego ityo.
Umukino ubanza waje kurangira amakipe yombi anganyije igitego 1-1 bivuze ko kugeza aka kanya Rayon Sports ifite amahirwe yo gukomeza mu gihe umukino wo kwishyura warangira ari 0-0 kuko yabashije gutsindira igitego hanze. N’ubwo umukino wabereye mu Rwanda gusa byabagarwa ko ari Al Hilal yakiriye.
Umukino wo kwishyura uteganyijwe kuri uyu wa gatandatu tariki 30 Nzeri 2023, ikipe ya Rayon Sports yakira Al Hilal n’ubundi kuri Kigali Pele Stadium. Birasaba ikipe ya Al Hilal kuzatsinda umukino wo kwishyura ngo ibashe kujya mu matsinda ya CAF Confederations Cup cyangwa igasabwa kuzanganya na Rayon Sports hejuru y’igitego 1-1, urugero amakipe yombi anganyije 2-2 mu mukino wo kwishyura ikipe ya Al Hilal yakomeza.
N’ubwo abafana batari bemewe ku kibuga ntibyakuyeho ko i Nyamirambo hafi ya stade imbaga nyamwinshi y’abafana ba Rayon Sports yari yaje gushyigikira ikipe ndetse bamwe bari buriye ibiti bikikije iyi stade ngo bakunde barebe uyu mukino imbonankubone.
