Kuri uyu wa gatandatu tariki 23 Nzeri 2023 nibwo muri BK Arena hategerejwe umukino wa FERWABA All Star Game uzakurikirwa n’igitaramo cy’abaraperi 2 bakomoka muri Afurika Y’Epfo Nasty C na Cassper Nyovest aba bombi bamaze no kugera i Kigali mu Rwanda.
Bimaze kumenyerwa ko buri nyuma ya shampiyona ya basketball mu Rwanda haba umukino uhuza amakipe abiri atorwa bitewe n’uko abakinnyi bitwaye. Kuri iyi nshuro hari ikipe ya TURATSINZE Olivier usanzwe ukinira Espoir BBC uyu wabaye umukinnyi mwiza muri shampiyona n’ikipe ya NSHOBOZWABYOSENUMUKIZA Jean Jacques Wilson usanzwe ukinira APR BBC wabaye umukinnyi mwiza mu mikino ya kamarampaka (BetPawa Playoffs).
Ishyirahamwe rya basketball hano mu Rwanda FERWABA rikaba ryaramaze gushyira hanze uko ingebihe y’uyu munsi izaba iteye;
12:00: Gufungura amarembo ya BK Arena
14:30: Kurushanwa gutsinda amanota 3 mu bari n’abategarugori (3-Points Shooting Contest)
15:20: Kurushanwa gutsinda amanota 3 mu bagabo
16:15: Imyiyerekano yo gutera dunk (Slum dunk)
17:10: Umukino wa All Star
20:10: Igitaramo
NSIKAYESIZWE David Junior Ngcobo wamenyekanye nka Nasty C w’imyaka 26 azwi mu ndirimbo nka Eazy, Allow arikumwe na French Montana, Strings and Bling, Let me in, God Flow, Particula, They don’t arikumwe na T.I ndetse n’izindi.
Refiloe Maele Phoolo wamenyekanye nka Cassper Nyovest w’imyaka 32 we azwi mu ndirimbo nka Soul, Baby Girl, Good for that, Summer Love, Nokuthula n’izindi. Aba bombi bakaba bageze i Kigali mu masaha y’ijoro yo kuri uyu wa gatanu.
Itike yo kwinjira kuri uyu mukino akaba ari 5,000 RWF ku banyeshuri, 10,000 RWF, 15,000 RWF, 25,000 RWF na 45,000 RWF.
