Nyuma y’uko REG BBC itsinzwe na APR BBC ku mukino wa nyuma wa BetPawa playoffs imikino 4 ku busa mu bagabo, no mu bari n’abategarugori niho biri kugana n’ubwo REG WBBC yari yabanje gutsinda umukino wa mbere.
Kuri uyu wa gatatu saa 19:00 z’umugoroba muri BK Arena nibwo hakinwaga umukino wa 4 wa BetPawa Playoffs mu bari n’abategarugori. APR WBBC yariyoboye n’imikino 2 ku mukino umwe wa REG WBBC yabyitwayemo neza maze ibasha gutsinda amanota 77-67.
Nyuma y’uyu mukino ikipe ya APR yahise ikomeza kuyobora n’imikino 3 yatsinze naho REG WBBC igumana umukino umwe. TETERO Odile ukinira APR WBBC niwe witwaye neza mu mukino kuko yatsinze amanota 28, akora rebounds 7, atanga imipira 5 yavuyemo amanota.
Kuri ubu APR WBBC irasabwa gutsinda umukino wa 5 ubundi igahita itwara igikombe kuko haba hateganywa gukina imikino 7 ariko amakipe yombi agatanguranwa gutsinda imikino 4. APR WBBC ikaba iri gutera ikirenge mu cya basaza babo begukanye igikombe cya BetPawa Playoffs batsinze REG BBC n’ubundi.
