Kizigenza mu mukino wa tennis mu bari n’abategarugori, umunya-Romania Simona Halep yamaze guhagarikwa igihe k’imyaka 4 adakina azira gukoresha imiti ibujijwe.
Kuri uyu wa kabiri nibwo ikigo mpuzamahanga cy’umukino wa tennis International Tennis Integrity Agency (ITIA) cyafatiye ibihano umukinnnyi wa tennis w’imyaka 31 y’amavuko Simona Halep aho ashinjwa gukoresha imiti itemewe mu irushanwa rya US Open muri 2022, ni nyuma y’ibipimo byafashwe maze mu nkari ze hagasangwamo imiti ya roxadustat iyi yaciwe ku bakinnyi kuko ifatwa nk’iyongera imbaraga. Mu busanzwe roxadustat ni imiti ikoreshwa n’abantu bagira ikibazo cy’amaraso make.
Ikirenze kuri ibi abahanga bagera kuri 3 bose bahurije ku ngingo y’uko Halep yaba akoresha ibiyobyabwenge ngo abashe kwitwara neza.
Nyuma y’uko ibi byose bimuhamye rero Halep akaba yahise afatirwa ibihano byo kumara imyaka 4 adakina. Uyo mugore yari yarahagaritswe mu Ukwakira 2022 ariko kandi yaragikurikiranwa, iyi myaka ine y’igihano yahawe adakina rero ikaba izarangira tariki 7 Ukwakira 2026, iki gihe azaba afite imyaka 36 y’amavuko.
Simona Halep yavuze ko umwaka ushize wamubereye ihurizo ku buzima bwe gusa ko urugamba rugikomeje, avuga ko kandi ubuzima bwe yabuhariye umukino wa tennis. Agaruka ku bihano yafatiwe, Halep yagize ati,”Nubaha amategeko n’amabwiriza agenga umukino wacu rero ndahamya neza ko ibyo nafashe bitemewe atari ku bushake. Mbabajwe no guhagarikwa imyaka 4 ntakina.”
Halep avuga ko kandi mbere y’umukino yari yabanje gusuzumwa n’itsinda ry’abagaga be basanga ari muzima ntakibazo, ntabintu bidasanzwe cyangwa bibujijwe biri mu mubiri we. Avuga ko kandi yasuzumwe icyumweru kimwe mbere y’uko bamusangamo imiti itemewe gusa ngo icyo gihe nabwo yasanze ari ntakibazo kiri mu mubiri we. Ngo yakinnye imikino n’amarushanwa menshi mu binyacumi bibiri bishize, yakorewe amasuzuma y’amaraso n’inkari arenga 200 ngo harebwe niba ntabinyabutabire biri mu mubiri we gusa yose yatanganga ubusa.
Simona Halep yatangiye gukina tennis nk’uwabigize umwuga muri 2006, yatowe bwambere mu n’ishyirahamwe ry’abagore mu mukino wa tennis Women’s Tennis Association (WTA) muri 2010. Yakinnye umukino wa nyuma we wa mbere 2014 mu irushanwa rya French Open gusa aza gutsindwa.
Halep yongeye kugera ku mukino wa nyuma 2017 mu irushanwa rya Roland Garros na 2018 mu irushanwa rya Australian Open gusa hose ntiyabashije gutsinda. Yaje gutwara igikombe ke cya mbere muri 2018 mu irushanwa rya French Open nyuma yo gutsinda Sloane Stephens, yongera gutwara igikombe cya Wimbledon muri 2019 nyuma yo gutsinda Serena Williams ku mukino wa nyuma. Muri 2017 na 2018 Simona Halep yabaye nimero ya mbere mu mukino wa tennis w’abari n’abategarugori ku isi.
