Mu gikombe cy’Afurika mu mukino wa volleyball mu bagabo gikomeje kubera i Cairo mu Misiri, urugendo rw’ikipe y’igihugu y’u Rwanda rwashyizweho akadomo nyuma yo gutsindwa n’ikipe y’igihugu ya Tunisia mu mukino wo guharanira umwanya wa 5-6.
Nyuma yo kwitwara neza mu matsinda maze u Rwanda rukaba urwa 2 mu itsinda D nyuma ya Maroc, rwahise ruhura n’ikipe y’igihugu ya Tanzania muri 1/8, rubasha kuyikuramo ruyitsinze amaseti 3-1. Muri 1/4 u Rwanda rwahise rucakirana n’ikipe y’igihugu ya Algeria yavuye mu itsinda A ari iya mbere maze ruvamo rutsinzwe amaseti 3-0.
Urugendo rwakomereje mu guhatanira umwanya wa 5-8, u Rwanda kuri uyu wa mbere rwahise rucakirana na Chad maze ruyitsinda amaseti 3-0 (25-21, 25-18, 25-20) bituma rujya mu guhatanira umwanya wa 5-6 aho rwahise ruhura na Tunisia.
Tunisia ifite igikombe giheruka ntiyahiriwe kuko nayo yaviriyemo muri 1/8. Kuri uyu wa kabiri rero nibwo u Rwanda na Tunisia bacakiranaga bahatanira umwanya wa 5-6. Muri uyu mukino ariko ikipe y’igihugu ya Tunisia yawutsinze bitayigoye amaseti 3-0 (25-17, 25-18, 25-21). Ibi byatumye ikipe y’igihugu ya Tunisia itahana umwanya wa 5 naho ikipe y’igihugu y’u Rwanda y’umutoza Paulo de Tarso Milagres itahana umwanya wa 6.
Mu yindi myanya, Chad yatsinze Maroc amaseti 3-0 (Yabaye mpaga kuko Maroc itigeze yitabira uyu mukino), ubwo Chad yabaye iya 7 naho Maroc iba iya 8. Ikipe y’igihugu ya Kenya yatsinze Ghana amaseti 3-2, Kenya yahise yegukana umwanya wa 9 naho Ghana yegukana umwanya wa 10. Gambia yatsinzwe na Senegal amaseti 3-0, ubwo Senegal yahise yegukana umwanya wa 11 naho Gambia yegukana umwanya wa 12. Ikipe y’igihugu ya Tanzania yatsinze u Burundi amaseti 3-1, Tanzania yegukanye umwanya wa 13 mu gihe u Burundi bwabaye ubwa 14. Ikipe y’igihugu ya Mali niyo iri ku mwanya wa nyuma wa 15.
Mu mikino ya 1/2 ikipe y’igihugu ya Misiri yatsinze Cameroon amaseti 3-1 (25-13, 25-23, 20-25, 29-27) byatumye Misiri yanakiriye iyi mikino ihita igera ku mukino wa nyuma. Ikipe y’igihugu ya Libya yaje gutsindwa na Algeria ku iseti ya kamarampaka amaseti 3-2, Algeria nayo igera ku mukino wa nyuma gutyo. Bivuze ko Algeria igomba gucakirana na Misiri ku mukino wa nyuma naho Libya igahura na Cameroon ku mukino wo guharanira umwanya wa 3.
