Ni igikombe cy’Afurika mu mukino wa volleyball gikomeje kubera mu Misiri. Nyuma yo gutsindwa umukino wa mbere wo mu matsinda, u Rwanda rwinyaye mu isunzu maze rutsinda ikipe y’igihugu ya Gambia mu mukino wa kabiri w’amatsinda.
Muri iki gikombe cyatangiye ku cyumweru, u Rwanda ruri mu itsinda D rwakinnye umukino wa mbere kuri uyu wa mbere rutsindwa n’ikipe y’igihugu ya Maroc amaseti 3-0. Kuri uyu munsi wo ku wa kabiri u Rwanda rwakinnye umukino warwo wa kabiri na Gambia. Muri uyu mukino u Rwanda rwitwaye neza maze rutsinda amaseti 3-1.
Muri uyu mukino watangiye ahagana saa 11:00 za hano mu Rwanda ubwo hari saa 12:00 i Cairo mu Misiri, u Rwanda rwatangiye rutwara iseti ya mbere birworoheye ku manota 25-11, mu iseti ya kabiri nayo ntiyagoye u Rwanda kuko rwayitwaye nabwo rutsinze amanota 25-11. Mu iseti ya 3 umutoza w’u Rwanda Paulo de Tarso yakoze impinduka asa nkushyiramo ikipe yakwitwa iya kabiri, ibi byaviriyemo u Rwanda gutakaza iyi seti maze Gambia iyitwara ku manota 25-20.
Mu iseti ya kane Gambia yakoze iyo bwabaga ngo irebe ko yatsinda iyi seti ubundi hagakinwa iseti ya kamarampaka gusa biza kutabakundira, bigoranye cyane u Rwanda rutsinda iyi seti ku manota 26-24, umukino urangira utyo ari amaseti 3 y’u Rwanda ku iseti 1 ya Gambia.
U Rwanda ruragaruka mu kibuga kuri uyu wa gatatu saa 11:00 za hano i Kigali rutana mu mitwe n’ikipe y’igihugu ya Senegal. Gutsinda uyu mukino byahita bifasha u Rwanda mu gukomeza mu kiciro gikurikiyeho cyo gukuranwamo, ni 1/4 k’irangiza. Mu wundi mukino wo mu itsinda ry’u Rwanda, itsinda D, Maroc yatsinze Senegal amaseti 3-0.
Mu yindi mikino yakinwaga kuri uyu munsi
ITSINDA A
Burundi 0-3 Algeria (10-25, 9-25, 17-25)
ITSINDA B
Mali 1-3 Tanzania (18-25, 22-25, 25-17, 24-26)
Tunisia 3-0 Chad (25-10, 25-10, 25-19)
ITSINDA C
Ghana 0-3 Cameroon (19-25, 17-25, 19-25)
Kenya 0-3 Libya (23-25, 25-22, 12-25)
