Biravugwa ko hari itsinda ry’abantu baturutse muri Saudi Arabia riri mu gihugu cy’Ubwongereza aho ryagiye kumvisha bamwe mu bakinnyi bakina muri shampiyona y’Ubwongereza Premier League ko bakwerekeza muri Saudi Pro League.
N’ubwo isoko ry’igura n’igurisha ryafunzwe mu mashampiyona akomeye y’i Burayi gusa abakinnyi bashobora kuva mu makipe yaho bakereza ahandi isoko rigifunguye.
Bamwe mu bakinnyi bifuzwa n’amakipe yo muri Saudi Arabia barimo Mohamed Salah, Jadon Sancho, Jamaal Lascelles, Demarai Gray na Donny van de Beek.
Mohammes Salah
Rutahizamu uca ku mpande ukomoka mu Misiri w’imyaka 31, Mohamed Salah yakomeje kwifuzwa n’ikipe ya Al-Ittihad, biravugwa ko hari itsinda ryaturutse muri Saudi Arabia ngo rize kumvisha ikipe ya Liverpool ko yagurisha uyu musore ndetse ngo biteguye kumutangaho agera kuri miliyoni ÂŁ200. Ibi kandi bigomba gukorwa vuba mbere y’uko isoko rifunga muri Saudi Arabia kuri uyu wa kane. Amakuru kandi avuga ko Mohamed Salaha nawe yiteguye kuva mu ikipe ya Liverpool.
Jadon Sancho
Umukinnyi wahoze ukinira Manchester United Rio Ferdinand yavuze ko nyuma y’uyu mwaka w’imikino ikipe ya Manchester United igomba guhita irekura rutahizamu uca ku mpande Jadon Sancho w’imyaka 23. Uyu musore yaje muri Manchester United avuye muri Borussia Dortmund gusa byinshi mu byo yari yitezweho ntiyabitanze, umusaruro we muri iyi kipe wakomeje kuba iyanga. Ibi binajyana no kuba umutoza w’iyi kipe ya Manchester United Erik Ten Hag mu mukino baherutse gutsindwamo n’ikipe y’Arsenal yamukuye mu bakinnyi yagombaga gukoresha kuri uyu mukino mu minota yanyuma avuga ko uyu musore yagaragaje urwego rwo hasi mu myitozo, nyamara Sancho yahise ajya ku rukuta rwe rwa Twitter anyomoza aya makuru avuga ko atari hasi mu myitozo ahubwo ko hari indi mpamvu yakuwe muri bagenzi n’ubwo atayivuze.
Uyu mubano utari mwiza hagati y’umutoza Erik Ten Hag na Jadon Sancho nawe urasunikiriza uyu mukinnyi kuba yakwerekeza ahandi. Biravugwa ko rero uyu mwongereza w’imyaka 23 ashobora guhita yerekeza muri Saudi Arabia mbere y’uko iyi kipe imwirekurira.
Jamaal Lascelles
Uyu musore w’imyaka 29 y’amavuko ukinira ikipe ya Newcastle United akaba ari na kapiteni wayo nawe ahanzwe ijisho na Saudi Arabia. Uyu musore ukina nka myugariro gusa utagikunze kugoreshwa cyane muri Newcastle United ngo ikipe ya Al-Shabab yaba imutera imboni ndetse ngo iramwifuza cyane, uyu mwongereza wageze muri Newcastle United 2014 akaba ari na kapiteni wayo ashobora nawe kwerekeza muri Saudi Arabia.
Demarai Gray
Uyu musore wavukiye mu Bwongereza gusa ukinira ikipe y’igihugu ya Jamaica w’imyaka 27 y’amavuko ukina nka rutahizamu uca ku mpande usanzwe ukinira ikipe ya Everton yo mu Bwongereza nawe arifuzwa muri Saudi Arabia. Biravugwa ko ikipe ya Al-Ettifaq yizeye kuba yatsindira uyu musore mbere y’ifungwa ry’isoko ry’igura n’igurisha ry’abakinnyi kuri uyu wa kane ndetse amakuru avuga ko uyu musore nawe yifuza gusohoka mu ikipe ya Everton.
Donny van de Beek
Van de Beek ni umusore w’imyaka 26 y’amavuko ukina mu kibuga hagati. Uyu musore ukinira Manchester United umusaruro yari yitezweho ntiyawutanze ubwo yagurwaga mu ikipe ya Ajax Amsterdam muri 2020, ibi ni nabyo bituma ikipe ya Manchester United ishaka kumugurisha. Bitewe n’uko amakipe y’Iburayi amushaka aba adatanga agatubutse nibyo bituma ikipe ya Manchester United yo ishaka kumugurisha muri Saudi Arabia kuko ariho batanga amafaranga menshi. Manchester United rero iratanguranwa n’umunsi wa nyuma w’isoko ry’igura n’igurisha muri Saudi Arabia cyane ko rirangira kuri uyu wa kane.
Aba bakinnyi baramutse berekeje muri Saudi Arabia baba basanzeyo abarimo Sadio Mane, Jordan Henderson, Robert Firmino, Riyad Mahrez, Alain Saint-Maximin, Fabinho, Kalidou Koulibaly, Edouard Mendy n’abandi bakinnyi bagiyeyo muri iyi mpeshyi ndetse bo baramenyereye kuko batangiye no gukina shampiyona yo muri iki gihugu.
