Ikipe ya Kiyovu Sports yasabye imbabazi abafana bayo kubwo gutangira nabi shampiyona y’u Rwanda Primus National League byumwihariko ni mu mukino iheruka gusuzugurwamo na Bugesera FC ikayinyagira ibitego 4-0.
Kiyovu Sports mu myaka ibiri ishize yari ikipe ikomeye ndetse yubakitse, yaharaniye igikombe cya shampiyona gusa ikomeza kukibura ku munota wa nyuma. Yageraga mu mikino 5 ya nyuma iyoboye urutonde rwa shampiyona gusa igahita itsikira, ibi bimaze kuba ubugira kabiri.
Mu mwaka ushize w’imikino Kiyovu Sports nyuma yo gutakaza igikombe cya shampiyona mu mikino ya nyuma yafashe umwanzuro wo gutandukana na bamwe mu bakinnyi, abenshi muri aba bari inkingi za mwamba muri iyi kipe. Ni abarimo uwari kapiteni umuzamu KIMENYI Yves, BIGIRIMANA Abedi, SERUMOGO Ally Omal, MUGENZI Bienvenue, BIZIMANA Amissi bitaga Coutinho, NSHIMIRIMANA Ismael, NDAYISHIMIYE Thierry, SSEKISAMBU Erisa na RIYAAD Norodien, umutoza mukuru LANDEUT Alain Andre, umwungiriza we MATESO Jean de Dieu n’uwarushinzwe kongerera abakinnyi ingufu Dabo Seydou nabo ntibasigaye.
Kiyovu Sports yatangaje ko ihinduye umuvuno, igiye gukoresha abakinnyi bakiri bato ubundi ikabashyiraho abanyamahanga b’ibikurankota nibwo yasinyishije umuzamu w’umugande KALYOWA Emmanuel, rutahizamu OBEDIAH Mikel Freeman, rutahizamu BAZOMBWA KIRONGOZI Richard, BASILUA MAKOLA Jeremie, CANGULUA AFONSO Sebastiao bakunze kwita Fofo, KALUMBA Brian, KAZINDU Guy Brian, MULUMBU Sullaiman, NIYONZIMA Olivier Sefu, GAKURU Matata na MUGUNGA Yves, bazanye umutoza mushya KOUKOURAS Petros n’umwungiriza we ZUNGU Hassan.
Byabindi ngo umuhini mushya utera amabavu ubanza aribyo Kiyovu Sports iri gucamo, mu mikino 3 ya shampiyona yamaze gukinwa ikipe ya Kiyovu Sports ifite amanota 4/9, yatsinze umukino umwe, itsindwa umukino umwe, inanganya umukino umwe. Yanganyije na Muhazi United 0-0, itsinda AS Kigali ibitego 2-0, itsindwa na Bugesera FC ibitego 4-0.
Nyuma y’umukino wa Bugesera FC abafana b’iyi kipe ntibabyumvaga. Ibi byatumye ikipe ya Kiyovu Sports ijya ku mbugankoranyambaga zayo maze itambutsaho ubutumwa bugira buti,”Turasaba imbabazi abafana n’abakunzi ba Kiyovu Sports, ni umusaruro ugoye kuwakira ariko twakizeza abafana ko tuzagaruka dufite imbaraga zizahaza ibyishimo byabo.”
Uwahoze atoza iyi kipe LANDEUT Alain Andre nyuma y’uyu mukino yageneye ubutumwa umusimbura we KOUKOURAS Petros asa nk’umutega iminsi agira ati,”Komera mugabo n’ubwo bakubeshye ntabwo uzi neza Kiyovu Sports ya nyayo, aba bana bato rwose ntakigenda, nubasha kugumisha ikipe mu kiciro cya mbere bizaba ari igitangaza, niyo mpamvu twakuyemo akacu karenge.”
Kiyovu Sports iheruka kumanuka mu kiciro cya kabiri muri 2019 gusa byarangiye itamanutse mu buryo bumwe cyangwa ubundi benshi batasobanukiwe impamvu zabyo.
Muri shampiyona Kiyovu Sports izakurikizaho ikipe ya Gasogi United, Gorilla FC, Amagaje FC, Marines FC na Police FC mu mikino itanu iri imbere.
