Ku munsi wa nyuma w’isoko ry’igura n’igurisha ry’abakinnyi ku mugabane w’iburayi nibwo umukinnyi wakiniraga Atletico Madrid yatijwe mu ikipe ya FC Barcelona gusa bitazwi mu byukuri igihe azahamara, ni rutahizamu ukomoka muri Portugal w’imyaka 23 witwa João Félix.
João Félix yakirwa nk’umukinnyi mushya wa FC Barcelona mu marira y’ibyishimo yavuze ko gukinira FC Barcelona zari inzozi ze kuva akiri umwana ati, “Zari inzozi zange gukinira FC Barcelona kuva mu bwana. Natangiye kureba Barcelona kuva nkiri umwana, nje hano gufasha ikipe no kugira umwaka mwiza w’imikino.”
FC Barcelona ku ruhande rwayo yarikeneye umukinnyi usatira uza gufasha abahasanzwe gusa ikagorwa no kuringaniza ibitabo by’ubukungu ngo itangwa mu bihano (financial fairplay). Kuba Félix byakunze ko yinjizwa mu ikipe, ikinyamakuru cyo muri Espagne Mundo Deportivo kivuga ko yemeye kugabanya umushahara we kabiri ngo ariko byemere ko yerekeza muri Barcelona.
João Félix yari yongereye amasezerano muri Atletico Madrid mbere yo kuza nk’intizanyo muri FC Barcelona, mu masezerano yo gutizwa kwe ntiharimo kuba ikipe ya FC Barcelona yamugura, ibi nibyo bituma utamenya igihe uyu musore azamara muri FC Barcelona nyuma y’umwaka nk’intizanyo.
Si João Félix gusa ikipe ya FC Barcelona yinjije ku munsi wa nyuma kuko yaninjije myugariro wo ku mpande nawe ukomoka muri Portugal João Cancelo. Cancelo nawe akaba yarinjiye mu ikipe ya FC Barcelona nk’intizanyo y’umwaka avuye muri Manchester City, amakuru avuga ko João Cancelo nawe yemeye kugabanya umushahara we ku ijanisha riri hahati ya 20-25 ngo abone uko yinjira muri FC Barcelona.
João Cancelo w’imyaka 29 mu ijambo yavuze nyuma yo kugera muri FC Barcelona yagize ati, “Ni inzozi zibaye impamo. Ndashimira umuryango wange, umu-agent wange, mama wange. Abanzi neza baziko abo mfata nk’ikitegererezo bose bakinnye hano.”
Mu mwaka ushize w’imikino João Félix yari intizanyo ya Atletico Madrid muri Chelsea mu gice cya kabiri cya shampiyona naho João Cancelo yari intizanyo ya Manchester City mu gice cya kabiri cya shampiyona mu ikipe ya Bayern Munich.
Aba bombi bakaba batangiye imyitozo muri FC Barcelona ndetse baragaragara ku mukino wo kuri iki cyumweru urayihuza na Osasuna muri shampiyona ya Espagne La Liga.
