Ikipe ya Manchester United yacunguje uburyo umwete maze mu gihe gito cyane yibikaho abakinnyi babiri b’ingenzi kandi yarikeneye cyane ni Sergio Reguilón ukina nka myugariro na Sofyan Amrabat ukina mu kibuga hagati yugarira.
Ikipe ya Manchester United yari yaguye mu matsa nyuma yo kuvukinikisha ba myugariro bayo bose b’ibumoso ni Tyrell Malacia na Luke Shaw, aba bombi ntibashobora kugaruka mu kibuga mbere y’Ugushyingo. Ibi byatumaga umutoza Erik Ten Hag bimusaba guhengeka Diego Dalot usanzwe yugarira ku ruhande rw’iburyo akamukinisha ku ruhande rw’ibumoso.
Malacia na Shaw bakimara kuvunika ikipe ya Manchester United yatangiye gushaka umuti w’iki kibazo aho yahise yerekeza mu ikipe ya Chelsea gushaka Marc Cucurella gusa byaje kurangira bidakunze ahubwo birangira izanye Umunya-Espagne w’imyaka 26 nk’intizanyo y’umwaka umwe kuva muri Tottehnam Hotspur Sergio Reguilón.
Umutoza Erik Ten Hag wa Manchester United yavuze ko Reguilón yahise atangira imyitozo muri Manchester United ndetse ntagihindutse agomba kugaragara ku mukino wo ku cyumweru iyi kipe izakirwamo na Arsenal kuri Emirates Stadium.
Si uyu mukinnyi gusa ikipe ya Manchester United yibitseho mu masaha ya nyuma kuko yamaze no kuzana umukinnyi wo mu kibuga hagati w’imyaka 27 ukomoka muri Maroc Sofyan Amrabat.
Kuva muri Kamena 2023 ikipe ya Manchester United yakomeje kuvugwa ko yifuza uyu musore gusa ntibikunde, kuva uyu mwaka w’imikino watangira Amrabat nawe yeretse ikipe ya Fiorentina yo mu Butaliyani ko atifuza kuyigumamo ndetse nayo ntiyigeze imukoresha.
Kera kabaye, Amrabat akaba yaje muri Manchester United nk’intizanyo gusa harimo n’amasezrano y’ubugure (Buy clause option). Manchester United yishyuye miliyoni €10 (euros) kuri uyu musore gusa mu gihe yakwitwara neza iyi kipe ikamushima yakwishyura ikipe ya Fiorentina miliyoni €20 zishobora kugera kuri miliyoni €25 maze iyi kipe ikamugura burundu.
Sofyan Amrabat ni umwe mu bakinnyi bari bakenewe cyane muri Manchester United cyane ko benshi bibazaga uko byagenda mu gihe Casemiro yavunika cyangwa se ugasanga rimwe na rimwe akeneye umuntu umufasha mu kibuga hagati.
Izi ni intwaro zishobora gufasha ikipe ya Manchester United iri kwitegura umukino wa shampiyona ifitanye na Arsenal ku cyumweru tutibagiwe imikino ya UEFA Champions League aho yisanze mu itsinda rimwe na Bayern Munich yo mu Budage, Copenhagen yo muri Denmark na Galatasaray yo muri Turkey.
