Kuri uyu wa kane tariki ya 31 Kanama 2023 saa 18:00 z’umugoroba nibwo hategerejwe tombora y’amatsinda y’igikombe cy’amakipe ya mbere ku mugabane w’iburayi UEFA Champions League, ni ibirori bizabera i Monaco mu Bufaransa.
Bitewe n’uko imikino ya shampiyona yo ku mugabane w’iburayi yarangiye, amakipe 26 ahita abona itike yo gukina imikino ya UEFA Champions League hanyuma andi makipe agakina imikino ya kamarampaka ngo haboneke andi makipe 6 yuzuza amakipe 32.
Amatsinda ajya gushyirwaho hari amakipe 32, agabanywa mu matsinda 8, buri tsinda rikajyamo amakipe 4.
Amatsinda akorwa hagendewe ku dukangara 4 tuba twakozwe, buri gakangara kajyamo amakipe bitewe n’uko yitwaye. Mu gakangara ka mbere hajyamo amakipe 8 yatwaye ibikombe bya shampiyona esheshatu za mbere ku mugabane w’iburayi, ikipe yatwaye UEFA Champions League iheruka n’ikipe yatwaye UEFA Europa League iheruka.
Kuri ubu mu gakangara ka mbere harimo ikipe ya Manchester City iheruka kwegukana UEFA Champions League, Sevilla iheruka kwegukana UEFA Europa League, Bayern Munich yatwaye shampiyona yo mu Budage, Paris Saint Germain (PSG) yatwaye shampiyona yo mu Bufaransa, FC Barcelona yatwaye shampiyona yo muri Espagne, Benfica yatwaye shampiyona yo muri Portugal, Napoli yatwaye shampiyona yo mu Butaliyani na Feyenoord yatwaye shampiyona yo mu Buholandi.
Mu busanzwe shampiyona yo mu Buholandi ntiri muri shampiyona 6 za mbere ku mugabane w’iburayi gusa ikipe ya Feyenoord yatwaye shampiyona yaho iri mu gakangara ka mbere, impamvu yabyo ni uko ikipe ya Manchester City yatwaye UEFA Champions League igatwara na shampiyona y’igihugu y’Ubwongereza bityo ikipe yatwaye shampiyona ya 7 mu Burayi yahawe amahirwe yo kujya mu gakangara ka mbere.
Mu tundi dukangara 3, amakipe ashyirwamo bitewe n’amanota afite muri UEFA, nko mu gakangara ka kabiri harimo amakipe 8 aho atanu muri yo ari ayabashije gutwara UEFA Champions League byibuze n’amakipe afite uburambe muri UEFA Champions League. Muri aka gakangara harimo Real Madrid, Manchester United, Inter Milan, Borussia Dortmund, Atletico Madrid, RB Leipzig, Arsenal na FC Porto.
Mu gakangara ka gatatu hashyizwemo amakipe afite uburambe muri UEFA Champions League n’amakipe yatwaye ibikombe mu zindi shampiyona. Muri aka gakangara ka gatatu harimo Shakhtar Donetsk, Salzburg, AC Milan, Braga, Lazio, Red Star Belgrade, ikipe itsinda umukino wa kamarampaka hagati ya PSV Eindhoven na Rangers, Young Boys cyangwa ikipe izatsinda imikino ya kamarampaka.
Mu gakangara ka kane ho hashyizwemo amakipe ataraherutse muri UEFA Champions League ndetse adafite uburambe muri iri rushanwa. Amakipe ari muri aka gakangara ni Real Sociedad, Galatasaray, Celtic, Newcastle United, Union Berlin, Lens, Young Boys cyangwa ikipe izatsinda imikino ya kamarampaka n’indi kipe imwe izitwara neza mu mikino ya kamarampaka.
Andi makipe ari mu mikino ya kamarampaka ni AEK Anthens, Royal Antwerp, FC Copenhagen na Rakow Czestochowa.
Bimwe mu bigenderwaho amakipe ashyirwa mu matsinda, ni uko nta kipe zo mu gihugu kimwe zijya mu itsinda rimwe ndetse n’amakipe yo mu gakangara kamwe ntashobora kujya mu itsinda rimwe.
Amatsinda namara gushyirwaho. Amatariki y’imikino 6 yo mu matsinda azaba ateye ku buryo bukurikira:
- Umunsi wa 1: 19-20 Nzeri 2023
- Umunsi wa 2: 3-4 Ukwakira 2023
- Umunsi wa 3: 24-25 Ukwakira 2023
- Umunsi wa 4: 7-8 Ugushyingo 2023
- Umunsi wa 5: 28-29 Ugushyingo 2023
- Umunsi wa 6: 12-13 Ukuboza 2023
