Professional Footballers’ Association Awards bizwi nka PFA Award ni ibihembo ngarukamwaka bihabwa abakinnyi bitwaye neza kurusha abandi mu gihugu cy’Ubwongereza. Ibi bihembo byatangiye gutangwa mu 1974 mu bagabo no muri 2013 mu bari n’abategarugori.
Haba amatora ngo hemezwe utwara igihembo aho buri munyamuryango w’ishyirahamwe ry’umupira w’amaguru mu Bwongereza atora abakinnyi 2. Abahatanira ibi bihembo batangazwa muri Mata hanyuma ibihembo bigatangwa mu birori bibera mu murwa mukuru w’ubwami bw’Ubwongereza London.
Mu bari n’abategarugori Lauren James yahembwe nk’umukinnyi w’umwaka ukiri muto (PFA Players’ Young Player of the Year), uyu akaba ari umwongereza w’imyaka 21 ukina nka rutahizamu ukinira ikipe y’abari n’abategarugori ya Chelsea. Igihembo cy’umukinnyi w’umwaka (PFA Player of the year) kegukanywe na rutahizamu w’umwongereza ukinira ikipe ya Aston Villa Rachel Daly. Rachel Daly w’imyaka 31 y’amavuko niwe watsinze ibitego byinshi muri shampiyona y’umwaka ushize w’imikino aho yatsinze ibitego 22 ndetse yafashije ikipe y’ubwami bw’Ubwongereza kugera ku mukino wa nyuma w’igikombe k’isi cy’abari n’abategarugori giherutse kwegukanwa na Espagne.
Mu bagabo ari naho haba hategerejwe na benshi, Bukayo Saka w’imyaka 21 ukinira ikipe y’Arsenal niwe wahembwe nk’umukinnyi mwiza w’umwaka ukiri muto (PFA Players’ Young Player of the Year), muri shampiyona y’umwaka ushize w’imikino, Bukayo Saka yatsinze ibitego 15, atanga imipira 15 yavuyemo ibitego. Bukayo Saka yatwaye iki gihembo ahigitse abarimo Gabriel Martinelli bakinana muri Arsenal, Jacob Ramsey wa Aston Villa, Evan Ferguson wa Brighton & Hove Albion, MoisĂ©s Caicedo wa Brighton & Hove Albion gusa ubu ukinira ikipe ya Chelsea na Erling Haaland wa Manchester City.
Igihembo cy’umukinnyi mwiza w’umwaka mu Bwongereza kikaba kegukanywe na Erling Haaland w’ikipe ya Manchester City, uyu musore w’imyaka 23 akaba yaratsinze ibitego 36 mu mikino 35 muri shampiyona y’umwaka ushize w’imikino. Haaland yegukanye iki gihembo ahigitse abarimo Kevin De Bruyne na John Stones bose bakinana muri Manchester City, Bukayo Saka na Martin Odegaard bakinira Arsenal na Harry Kane wakiniraga Tottenham Hotspur gusa ubu ukinira ikipe ya Bayern Munich yo mu Budage.
Ikipe y’umwaka mu bari n’abategarugori yarangajwe imbere n’umuzamu Mary Earps wa Manchester United; Ona Batlle (Manchester United), Maya Le Tissier (Manchester United), Alex Greenwood (Manchester City), Rafaelle Souza (Arsenal); Frida Maanum (Arsenal), Guro Reiten (Chelsea), Yui Hasegawa (Manchester City); Rachel Daly (Aston Villa), Bunny Shaw (Manchester City) na Sam Kerr (Chelsea).
Mu bagabo, ikipe nziza y’umwaka yagaragayemo umuzamu Aaron Ramsdale (Arsenal); Kieran Trippier (Newcastle United), William Saliba (Arsenal), John Stones (Manchester City), Ruben Dias (Manchester City); Rodri (Manchester City) Kevin De Bruyne (Manchester City), Martin Odegaard (Arsenal); Bukayo Saka (Arsenal), Harry Kane (Tottenham) na Erling Haaland (Manchester City).
Mu bindi bihembo byatanzwe ni icy’umuntu w’indashyikirwa (PFA Merit Award) cyahawe umunyamakuru Ian Wright uyu wanakinnye ruhago aho yamenyekanye mu ikipe ya Crystal Palace na Arsenal.
Igihembo giheruka cyari kegukanywe na Mohamed Salah naho Phil Foden yahembwe nk’umukinnyi ukiri muto. Ntamukinnyi urabasha gutwara PFA players’ player of the year inshuro 3, abayitwaye inshuro nyinshi bayitwaye inshuro 2 barimo Mark Hughes, Alan Shearer, Thierry Henry, Cristiano Ronaldo, Gareth Bale, Kevin De Bruyne na Mohamed Salah.
Kuva PFA players’ player of the year yatangira gutangwa Thierry Henry, Cristiano Ronaldo and Kevin De Bruyne ni bo bakinnyi bonyine babashije gutwara iki gihembo inshuro 2 bikurikiranya. Abakinnyi barimo Luis Suárez (Uruguay), Riyad Mahrez (Algeria) na Mohamed Salah (Egypt) nibo bonyine babashize gutwara PFA players’ player of the year badaturuka ku mugabane w’iburayi.
