Ikipe ya AS Kigali yamaze gukina imikino ibiri ya shampiyona y’u Rwanda aho yatsinze umwe nayo igatsindwa umwe. AS kigali yatsinze Bugesera FC ku munsi wa mbere wa shampiyona igitego 1-0 ariko ku munsi wa kabiri itsindwa inarushwa n’ikipe ya Kiyovu Sports ibitego 2-0.
AS Kigali yatakaje abakinnyi benshi bo mu kibuga hagati barimo NIYONZIMA Olivier (Sefu) wagiye muri Kiyovu Sports, KALISA Rashid wagiye muri Rayon Sports na AKUKI Djibrine wagiye muri Police FC n’abandi. Nyuma y’umukino AS Kigali yatsinzwemo na Kiyovu Sports, umutoza Cassa Mbungo AndrĂ© wa AS Kigali yavuze ko bakeneye kongeramo abakinnyi haba muri ba myugariro, mu kibuga hagati na rutahizamo umwe ndetse akomoza ku kuba iyi kipe ifite abakinnyi bake.
Mu gihe isoko ry’igura n’igurisha rizafunga ku wa mbere tariki ya 28 Kanama 2023 ikipe ya AS Kigali yamaze gusinyisha umukinnyi wo mu kibuga hagati uvuye mu ikipe ya Rayon Sports Raphael Osaluwe Olise waruyimazemo umwaka umwe. Uyu ukomoka muri Nigeria yageze muri Rayon Sports muri 2022 avuye mu ikipe ya Bugesera FC gusa uyu musore ntiyabonye umwanya uhagije wo gukina muri Rayon Sports kuko yakunze kurangwa n’imvune hakiyongera ho ko kuri ubu Rayon Sports yasinyishije abakinnyi benshi bo mu kibuga hagati.
Undi mukinnyi AS Kigali yamaze kwibikaho utari Osaluwe ni rutahizamu ukomoka mu Bugande uherutse gutandukana n’ikipe ya Kiyovu Sports Erisa Ssekisambu. Uyu nawe yaramaze umwaka umwe muri Kiyovu Sports aho yayigezemo muri 2022 avuye muri KCCA y’iwabo mu Bugande. Erisa Ssekisambu w’imyaka 27 nawe yamaze kumvikana n’ikipe ya AS Kigali kuzayikinira muri uyu mwaka w’imikino.
