Sofyan Amrabat ni umusore w’imyaka 27 ukomoka muri Maroc usanzwe ukinira ikipe ya Fiorentina yo mu Butaliyani. Uyu musore nyuma yo kwigaragaza mu gikombe k’isi cya 2022 yahise atangira kugerwa amajanja n’amakipe akomeye agiye atandukanye.
Ku rutonde rw’amakipe yifuza Amrabat, ku ikubitiro ni ikipe ya Manchester United yo mu Bwongereza gusa iyi kipe ntabwo mu buryo bweruye iragira icyo ibwira ikipe ya Fiorentina.
Si Manchester United gusa yifuza Sofyan Amrabat kuko n’ikipe ya Napoli iherutse kwegukana igikombe cya shampiyona yo mu Butaliyani nayo isaha n’isaha ishobora kugira icyo ikora kuri uyu musore gusa ngo yo igorwa n’amafaranga miliyoni £30 ikipe ya Fiorentina imwifuzamo.
Mu gihe habura iminsi 5 gusa ngo isoko ry’igura n’igurisha ry’abakinnyi rirangire, Sofyan Amrabat yanze gukora imyitozo muri Fiorentina ndetse ntari mu bakinnyi iyi kipe irakoresha ku mukino wa shampiyona ifite kuri iki cyumweru aho yakira Lecce.
