Myugariro ukinira ikipe y’igihugu ya Espagne w’imyaka 29 y’amavuko Aymeric Laporte yamaze gutandukana n’ikipe ya Manchester City yo mu Bwongereza yakiniraga maze yerekezeza muri shampiyona yo muri Saudi Arabia Saudi Pro League kuri miliyoni £23.6m.
Aymeric Laporte yageze mu ikipe ya Manchester City muri 2018 avuye muri Athletic Bilbao, yafashije iyi kipe kwegukana ibikombe bigera kuri kuri 12 mu myaka itanu n’igice yarahamaze, byumwihariko harimo bitatu batwaye mu mwaka ushize w’imikino.
Nyuma yo kugura Manuel Akanji na Nathan Ake, umutoza wa Manchester City Pep Guadiola nibo yakunze gukoresha cyane kurusha Aymeric Laporte ku buryo mu mwaka ushize w’imikino uyu musore yakinnye imikino 24 gusa mu mwaka wose.
Byakomeje gukomerera uyu musore nyuma yaho Manchester City inaguze undi myugariro Josko Gvardiol imukuye muri RB Leipzig, byagaragaye ko bigoye ko uyu musore yakongera kubona umwanya uhagije wo gukina ahitamo kureba uko yagana ahandi.
Yifujwe n’amakipe nka Arsenal yo mu Bwongereza gusa byarangiye yerekeje muri Saudi Arabia mu ikipe ya Al Nassr aho asanze abarimo Cristiano Ronaldo, Alex Telles, Marcelo Brozovic, Sadio Mane, n’abandi.
Mu mikino 180 Aymeric Laporte yakiniye Manchester City yayitsindiye ibitego 12. Mu butumwa yanyujije ku mbugankoranyambaga ze asezera abafana ba Manchester City yagize ati;”Byari iby’agaciro kwambara umwenda wa Manchester City kandi ndizera ko muzanyibuka mu buryo bwiza. Nzahora ndi umufana wa Manchester City kandi nizeye ko tuzongera kubonana.”
