Kuri uyu wa gatatu tariki 23 Kanama 2023 haratangira imikino ya nyuma ya shampiyona y’u Rwanda mu mukino wa basketball Betpawa play-offs.
Nyuma yo guhatana, amakipe yo muri shampiyona yose azengurukana, amakipe ane (4) ya mbere aba agomba gukina imikino ya kamarampaka ngo haboneke itwara igikombe cya shampiyona ari nayo ihagararira u Rwanda mu mikino nyafurika ya Basketball Africa League (BAL).
Ikipe yabaye iya mbere muri shampiyona isanzwe ihabwa amahirwe ihura n’iyabaye iya kane naho ikipe yabaye iya kabiri igahura n’iyabaye iya gatatu.
Muri iki kiciro twagereranya na 1/2 k’irangiza amakipe akina imikino 5 hanyuma itsinze itatu muri yo ikerekeza ku mukino wa nyuma. Ku mukino wa nyuma ho hakinwa imikino 7 ibashije gutanga indi imikino 4 ikaba ari yo itwara igikombe. Ibi binamenyerewe muri shampiyona y’umukino wa basketball ya mbere ku isi yo muri Leta Zunze Ubumwe z’Amerika NBA.
Mu bari n’abategarugori ikipe ya APR WBBC yabaye iya mbere iracakirana na The Hoops Rwanda kuri uyu wa gatatu muri Lycee de Kigali saa 19:00 z’umugoroba ndetse kwinjira ni ubuntu. Undi mukino uzahuza REG WBBC na RP Ipro Huye.
Mu bagabo, ikipe ya REG BBC yabaye iya mbere iracakirana na Espoir BBC yabaye iya kane kuri uyu wa gatatu saa 19:00 z’umugoroba naho Patriots BBC yabaye iya kabiri icakirane na APR BBC yabaye iya gatatu kuri uyu wa gatatu saa 21:00 z’umugoroba, uyu ni nawo mukino utegerejwe na benshi. Imikino yose y’abagabo izabera muri BK Arena.
Ibiciro byo kwinjira ku mikino y’abagabo muri BK Arena ni 2,000 RWF, 5,000 RWF, 10,000 RWF na 20,000 RWF naho ku mikino y’abari n’abategarugori izabera muri LDK kwinjira ni 5,000 RWF na 10,000 RWF. Iyi mikino yiswe Betpawa play-offs ku mpamvu z’umuterankunga.
