Wari umunsi wa kabiri wa shampiyona y’ikiciro cya mbere mu mupira w’amaguru mu gihugu cy’Ubwongereza Premier League. Ni umunsi watangiye kuri uyu wa gatanu ikipe ya Nottingham Forest itsinda Sheffield United ibitego 2-1.
Kuri uyu wa gatandatu imikino y’umunsi wa kabiri yakomeza. Ku ikubitiro Fulham mu rugo yatsinzwe na Brentford ibitego 3-0, Liverpool mu rugo kuri Anfield ibifashijwemo na Luis Diaz, Mohamed Salah na Diogo Jota ibasha gutsinda AFC Bournemouth ibitego 3-1, Wolverhampton Wanderers yaje gukubitirwa kuri stade yayo Molineux Stadium ibitego 4-1 na Brighton & Hove Albion, umukino wari utegerejwe na benshi ni uwahuje Tottenham Hotspur na Manchester United kuri Tottenham Hotspur Stadium.
Manchester United yari yarabonye amanota 3 ku mukino wa mbere nyuma yo gutsinda Wolverhampton Wanderers igitego 1-0 gusa abafana bayo ntibari bishimye n’ubwo insinzi yari yabonetse kuko ikipe yabo itari yakinnye neza. Yakagombye kwerekana ko ikomeye koko mu guhura n’indi kipe ikomeye, ibi byaje kuba amatakirangoyi kuko ikipe ya Tottenham Hotspur yaje kuyikubita ibitego 2-0 byatsinzwe n’umunya-senegal Pape Matar Sarr ku munota wa 49 na myugariro wa Manchester United Lisandro Martinez witsinze igitego ku munota wa 83 nyuma y’umupira warutewe na Ben Davies, yawukoraho bigatuma ujya mu izamu.
Ni Manchester United yaguze abarimo umuzamu AndrĂ© Onana, umukinnyi wo mu kibuga hagati Mason Mount bose bari mu kibuga gusa umusaruro w’iyi kipe wabaye iyanga. Ibi byateje impungenge abafana ba Manchester United ko uyu mwaka ushobora kubagora bitewe n’uko ikipe yabo iri kwitwara, ku rundi ruhande ariko iyi kipe yimwe penaliti ku umupira warutewe neza na Alejandro Garnacho maze myugariro wa Tottenham Hotspur Cristian Romero awugaruza amaboko.
Undi mukino warutegerejwe na benshi ni uwahuzaga Manchester City na Newcastle United, ni umukino wari witezwemo ibitego byinshi gusa igitego cya Julian Alvarez n’icyo cyatandukanyije impande zombi.
Kuri iki cyumweru imikino y’umunsi wa kabiri muri Premier League irakomeza Aston Villa yakira Everton saa 15:00 za hano i Kigali, West Ham United saa 17:30 yakira Chelsea. Umukino Crystal Palace izakira Arsenal ku wa mbere saa 21:00 ni wo uzafunga umunsi wa kabiri wa Premier League.
